काठमाडौं । नेपाली कांग्रेसका महामन्त्री गगन थापाले विशेष महाधिवेशन पार्टीको विधानअनुसार नै आयोजना गरिएको स्पष्ट पारेका छन्।
केन्द्रीय कार्यसम्पादन समिति बैठकपछि संचारकर्मीसँग कुरा गर्दै थापाले पार्टीकै नेताहरूद्वारा पहल भएको महाधिवेशनमा पार्टी सभापति शेरबहादुर देउवाको उपस्थिति आवश्यक रहेको बताए।
उनले भने, “२७ गते आयोजित विशेष महाधिवेशन पार्टीकै साथीहरूले आयोजना गरेको, विधानसम्मत अधिवेशन हो। सभापतिज्यू सहभागी हुनुहुन्छ भने उहाँकै मान प्रतिष्ठा बढ्छ ।”
थापाले नियमित महाधिवेशन पक्षधरहरूले विधानको अपव्याख्या गर्दै विशेष महाधिवेशनलाई गलत ठहर्याउन खोजेको आरोप लगाए। उनका अनुसार विशेष महाधिवेशन प्रतिनिधिहरूको अधिकार स्थापना गर्ने प्रक्रिया हो र समसामयिक संवेदनशील परिस्थितिका कारण यसको आवश्यकता देखिएको हो।
भदौ २३ र २४ पछि देखिएको असन्तुष्टिलाई सम्बोधन गर्नुपर्ने बेला केही नेतृत्व त्यसलाई स्वीकार्न तयार नभएको उनले गुनासो गरे। “नीति पनि फेरौं, नेतृत्व पनि फेरौं भन्ने माग उठिरहेको छ,” थापाले भने। विशेष महाधिवेशन गर्दा पार्टी फुट्ने भन्दै हल्ला फैलाइएको दाबी पनि उनले गरे।
उनका अनुसार केही व्यक्तिहरूले महाधिवेशनमा सहभागी नहुन आग्रह गर्ने प्रयास गरे पनि नागरिकसँग पार्टीलाई जोड्ने अभियानमा आफूहरू केन्द्रित रहेको स्पष्ट पारे। उनले पार्टी फुटाउने आरोप निराधार भएको स्पष्ट पारे ।
प्रतिक्रिया