काठमाडौं । राजधानीको भृकुटीमण्डपमा नेपाली कांग्रेसको विशेष महाधिवेशन जारी रहँदा पार्टी सभापति शेरबहादुर देउवाले आफ्ना निकट नेताहरूलाई महाराजगन्जस्थित निजी निवासमा बोलाएका छन् । विशेष महाधिवेशनले पार्टीभित्रको आन्तरिक राजनीति तातेको बेला देउवाको यो कदमलाई महत्वपूर्ण रूपमा हेरिएको छ ।
देउवानिकट एक नेताका अनुसार कार्यवाहक सभापति पूर्णबहादुर खड्कासहित वरिष्ठ नेता रमेश लेखक देउवा निवास पुगिसकेका छन् । उनीहरूबीच वर्तमान राजनीतिक अवस्था, विशेष महाधिवेशनको प्रभाव, पार्टीको भावी रणनीति तथा नेतृत्वको भूमिकाबारे छलफल भइरहेको बुझिएको छ ।
ती नेताका अनुसार अन्य नेताहरू पनि देउवा निवासतर्फ आउने क्रम जारी रहेको छ । विशेष महाधिवेशनले पार्टीभित्र देखिएको असन्तुष्टि र नेतृत्वमाथि उठेका प्रश्नका बीच सभापति देउवाले निकट नेताहरूसँग परामर्श थालेका हुन् ।
उल्लेखनीय छ, पार्टीभित्र बढ्दो असन्तुष्टि र आन्तरिक मतभेदलाई मध्यनजर गर्दै महामन्त्रीद्वय गगनकुमार थापा र विश्वप्रकाश शर्माले विशेष महाधिवेशन आह्वान गरेका थिए । सोही आह्वानअनुसार भृकुटीमण्डपमा महाधिवेशन चलिरहेको छ, जहाँ नेतृत्व, नीति तथा संगठनात्मक सुधारका विषयमा बहस भइरहेको छ ।
विशेष महाधिवेशन र देउवाको समानान्तर राजनीतिक गतिविधिले कांग्रेसको आन्तरिक शक्ति सन्तुलन र भावी दिशामा गहिरो प्रभाव पार्ने विश्लेषण गरिएको छ ।
प्रतिक्रिया