कांग्रेस विशेष महाधिवेशनमा ६२.४ प्रतिशत प्रतिनिधिको उपस्थिति

काठमाडौं । नेपाली कांग्रेसको विशेष महाधिवेशनमा ६२.४ प्रतिशत महाधिवेशन प्रतिनिधि उपस्थित भएका छन्।

आयोजकले जनाएको अनुसार प्रतिनिधिहरू उपस्थित भई हस्ताक्षरसमेत गरिसकेका छन्। यसअघि विशेष महाधिवेशन आह्वानका लागि ५४ प्रतिशत प्रतिनिधिले हस्ताक्षर बुझाएका थिए। तिनै महाधिवेशन प्रतिनिधिहरूको मागअनुसार महामन्त्री गगनकुमार थापा र विश्वप्रकाश शर्माले विशेष महाधिवेशनको आह्वान गरेका हुन्।

कांग्रेसमा देशभरबाट जम्मा ४ हजार ७ सय ४३ जनाभन्दा बढी प्रतिनिधि रहेको जनाइएको छ।

सभापति शेरबहादुर देउवासहित संस्थापन पक्षका नेताहरूले ढिलाई गर्ने प्रयास गरेपछि महामन्त्रीद्वयले स्वयं नेतृत्व लिएर महाधिवेशन बोलाएका हुन् ।

विशेष महाधिवेशनका लागि नाम दर्ता शुल्क एक हजार रुपैयाँ तोकिएको छ। कार्यक्रम स्थलमा पुगेका प्रतिनिधिहरूले नाम दर्ता गरी प्रवेश कार्ड लिने प्रक्रिया साँझसम्म जारी छ।