बुटवल । रुपन्देहीको बुटवलमा अवस्थित देशकै उत्कृष्ट सामुदायिक विद्यालयका रूपमा परिचित कालिका मानवज्ञान माध्यमिक विद्यालयको विद्यालय व्यवस्थापन समितिको अध्यक्षमा नित्यानन्द ज्ञवाली पुनः सर्वसम्मत रूपमा चयन भएका छन् ।
शुक्रबार विद्यालय परिसरमा आयोजित अभिभावकहरूको भेलाले ज्ञवालीलाई दोस्रो पटक पनि विद्यालय व्यवस्थापन समितिको अध्यक्षको जिम्मेवारी सुम्पिएको हो । भेलाले विद्यालयको निरन्तर शैक्षिक प्रगति, व्यवस्थापनमा देखिएको सुधार र नेतृत्वप्रति विश्वास जनाउँदै ज्ञवालीलाई पुनः नेतृत्वमा चयन गरेको बताइएको छ ।
भेलाबाट बुटवल उपमहानगरपालिका वडा नम्बर १० का अध्यक्ष बलबहादुर पुनलाई वडा प्रतिनिधिका रूपमा पदेन सदस्य चयन गरिएको छ । त्यस्तै, विद्यालय व्यवस्थापन समितिका सदस्यहरूमा यमुना काउचा, तेजेन्द्र खनाल, सुमित्रा बराल, खुमानन्द भण्डारी र टीका ओली चयन भएका छन् ।
नवगठित विद्यालय व्यवस्थापन समितिको सदस्य सचिवको जिम्मेवारी विद्यालयका प्रधानाध्यापक दिनेश थापाले सम्हाल्नेछन् ।
अध्यक्षमा पुनः निर्वाचित नित्यानन्द ज्ञवाली यसअघि पनि विद्यालय व्यवस्थापन समितिको नेतृत्व गरिसकेका अनुभवी व्यक्ति हुन् । उनले विद्यालयको शैक्षिक गुणस्तर अभिवृद्धि, अनुशासित शैक्षिक वातावरण निर्माण, भौतिक तथा प्राविधिक पूर्वाधारको विकास र सामुदायिक सहभागिता थप मजबुत बनाउने प्रतिबद्धता व्यक्त गरेका छन् ।
अभिभावक भेलामा विद्यालयको समग्र अवस्था, उपलब्धि र आगामी योजनाबारे समेत छलफल भएको थियो । सहभागी अभिभावकहरूले नयाँ कार्यसमितिले विद्यालयलाई अझ नमूना र प्रतिस्पर्धी सामुदायिक विद्यालयका रूपमा अघि बढाउने विश्वास व्यक्त गरेका छन् ।
प्रतिक्रिया