बुटवल । बुटवलको सुख्खानगरस्थित अक्सफोर्ड माध्यमिक विद्यालयले सरस्वती पूजा तथा पुरस्कार वितरण कार्यक्रम भव्य रूपमा सम्पन्न गरेको छ । विद्यालय व्यवस्थापन समितिका अध्यक्ष दुर्गादत्त भण्डारीको अध्यक्षता तथा शिक्षा विकास समन्वय इकाई रुपन्देहीका प्रमुख विष्णुप्रसाद पन्थीको प्रमुख आतिथ्यतामा कार्यक्रम सम्पन्न भएको हो ।
कार्यक्रमलाई सम्बोधन गर्दै शिक्षा विकास समन्वय इकाई रुपन्देहीका प्रमुख विष्णुप्रसाद पन्थीले शिक्षाको गुणस्तरीय सुधारसँगै व्यवहारिक र प्रयोगात्मक शिक्षामा सबै विद्यालयले विशेष ध्यान दिनुपर्ने बताए । उनले अक्सफोर्ड माध्यमिक विद्यालयले शिक्षा क्षेत्रमा पुर्याउँदै आएको योगदानको प्रशंसा गर्दै समयअनुसार प्रविधिमैत्री शिक्षण पद्धतिमा जोड दिनुपर्ने आवश्यकता औंल्याए ।
प्रमुख अतिथि पन्थीले विश्व बजारमा एआई, च्याट जिपिटी जस्ता प्रविधिको तीव्र विकास भइरहेको सन्दर्भ उल्लेख गर्दै अब शिक्षकहरू स्वयं पनि प्रविधिसँग प्रतिस्पर्धा गर्नुपर्ने अवस्था आएको बताए । “शिक्षकहरूले प्रविधिलाई आत्मसाथ गर्दै नयाँ सिकाइ गतिविधि अपनाउन सके मात्र विद्यार्थीलाई समयसापेक्ष शिक्षा दिन सकिन्छ,” उनले भने ।
विद्यालयका प्राचार्य दिनेश भुसालले अक्सफोर्ड विद्यालयले व्यवहारिक तथा प्रयोगात्मक शिक्षण सिकाइलाई प्राथमिकतामा राख्दै आएको बताए । विद्यार्थीलाई किताबी ज्ञानमा मात्र सीमित नराखी संस्कारयुक्त शिक्षा प्रदान गर्नु विद्यालयको मुख्य उद्देश्य रहेको उल्लेख गर्दै त्यसअनुसार योजनाबद्ध रूपमा शैक्षिक गतिविधि सञ्चालन गरिरहेको उनले जानकारी दिए ।
कार्यक्रमको अवसरमा कक्षा ९ र १० मा सर्वोउत्कृष्ट नतिजा हासिल गर्ने विद्यार्थीहरूलाई सम्मान तथा पुरस्कार प्रदान गरिएको थियो ।
कार्यक्रममा विद्यालयका सह-प्राचार्य सुमन भुसाल, अक्सफोर्ड कलेजका प्रमुख मनोज मरासिनी, शिक्षा विकास समन्वय इकाई रुपन्देहीका शाखा अधिकृत झविलाल विश्वकर्मा, अभिभावक संघका केन्द्रीय सदस्य लोकनाथ ज्ञवाली लगायतले मन्तव्य व्यक्त गर्दै विद्यालयको शैक्षिक गतिविधि र उपलब्धिको प्रशंसा गरेका थिए ।
प्रतिक्रिया