काठमाडौँ । नेपाली कम्युनिष्ट पार्टी (नेकपा) ले हरिबोल गजुरेलसहित ७ जनालाई पार्टीबाट निस्काशन गरेको छ ।
नेकपाका संयोजक पुष्पकमल दाहाल प्रचण्ड र सहसंयोजक माधवकुमार नेपालले विज्ञप्ति जारी गर्दै गजुरेलसहित सात जना नेताहरुलाई पार्टीबाट निस्काशन गरिएको जनाएका हुन् ।
पार्टीको आधिकारिक निर्णय र निर्देशन विपरीत उम्मेदवारी दिएका र उनीहरुको प्रस्ताव समर्थक बनेका सात जना नेता–कार्यकर्तालाई पार्टीबाट निष्कासन गरेको छ।
पार्टीबाट निष्कासित हुनेहरूमा हरिबोल गुरुङ (सिन्धुली), महेश्वस दाहाल (सिन्धुली), कुलप्रसाद केसी (दाङ), मेजर राई (उदयपुर), धर्मनाथ साह (सिरहा), राजकुमारी साह (सिरहा) र जितेन्द्र साह (सिरहा) रहेका छन्।
विज्ञप्तिअनुसार आगामी फागुन २१ गते हुन गइरहेको आम निर्वाचनमा नेकपाका आधिकारिक उम्मेदवार रहेका निर्वाचन क्षेत्रमा पार्टीको निर्णय उल्लङ्घन गरी उम्मेदवार बनेका तथा त्यस्ता उम्मेदवारका प्रस्तावक, समर्थक र प्रचारक बनेका व्यक्तिहरूमाथि पार्टी विधानअनुसार कारबाही गरिएको हो।
विज्ञप्तिमा पार्टी विधानको दफा १०६ बमोजिम अनुशासनको कारबाही गर्दै सम्बन्धित व्यक्तिहरूलाई पार्टी सदस्यताबाट निष्कासन गरिएको स्पष्ट पारिएको छ।
सिन्धुली क्षेत्र नं. २ मा पार्टीका अधिकारिक उम्मेदवार लेखनाथ दाहाल विरुद्ध उम्मेदवारी दिएका महेश्वर दाहालको प्रस्तवकमा हरिबोल गजुरेल रहेका छन् । गजुरेललाई पार्टी निर्णय पालना गर्न र दाहालललाई उम्मेदवारी फिर्ता लिन प्रचण्डले हिजो मात्र निर्देशन दिएका थिए । तर गजुरेलले प्रचण्डको निर्देशन अस्वीकार गरेका थिए । यस्तै, दाङ क्षेत्र नं. १ मा पार्टीका आधिकारिक उम्मेदवार मेटमणि चौधरी विरुद्ध कुलप्रसाद केसीले उम्मेदवारी दिएका थिए । उनले पनि पार्टी केन्द्रको निर्देशन विपरित उम्मेदवारी फिर्ता गर्न अस्वीकार गरेका थिए । यस्तै सिरहाका धर्मनाथ साह भने एमालेबाट उम्मेदवार बनेका छन् ।
प्रतिक्रिया