बुटवल । इलाका प्रहरी कार्यालय बुटवलमा हालै सरुवा भई आएका प्रमुख प्रहरी नायब उपरीक्षक (डीएसपी) निशान्त श्रीवास्तवले समाजमा शान्ति, सुरक्षा तथा अमन–चयन कायम गर्न प्रहरीले कडाइका साथ कदम चाल्ने बताएका छन् ।
सञ्चारकर्मीहरूसँगको कुराकानीमा डीएसपी श्रीवास्तवले समाजमा घट्ने स-साना घटना तथा परिघटनालाई पनि गम्भीर रूपमा लिइने उल्लेख गर्दै निष्पक्ष अनुसन्धान गरी दोषीलाई कानुनी दायरामा ल्याइने प्रतिबद्धता व्यक्त गरे ।
“जनताको शान्ति र सुरक्षाप्रति प्रहरी पूर्ण रूपमा प्रतिबद्ध छ । कुनै पनि प्रकारका आपराधिक गतिविधि सह्य गरिने छैन,” उनले भने । यद्यपि अपराध नियन्त्रण प्रहरीको मात्र जिम्मेवारी नभएको उल्लेख गर्दै उनले समुदायको सक्रिय सहयोग अपरिहार्य रहेको धारणा राखे ।
“प्रहरी र नागरिकबीचको सहकार्य र समन्वय बलियो भयो भने मात्र अपराध नियन्त्रण प्रभावकारी हुन सक्छ,” डीएसपी श्रीवास्तवले स्पष्ट पारे ।
उनका अनुसार लागूऔषध दुरुपयोग तथा अवैध कारोबार नियन्त्रण, जुवा-तास, चोरी-डकैती, घरेलु हिंसा, ध्वनि प्रदूषण, ट्राफिक अनुशासन उल्लङ्घन तथा सामाजिक शान्ति खल्बल्याउने गतिविधिमाथि कडा निगरानी गरिनेछ ।
अवैध गतिविधिमा संलग्न जो-कोहीलाई पनि कानुनअनुसार कारबाही गरिने स्पष्ट पार्दै उनले आगामी चाडपर्वहरू शान्तिपूर्ण, निष्पक्ष र मर्यादित रूपमा सम्पन्न गराउन प्रहरीले उच्च सतर्कता अपनाउने जानकारी दिए ।
डीएसपी श्रीवास्तवले शान्त, सुरक्षित र सभ्य समाज निर्माणका लागि प्रहरीलाई समयमै सूचना दिन, सहयोग गर्न र कानुनको पालना गर्न सबै नागरिकलाई आग्रहसमेत गरे ।
प्रतिक्रिया