काठमाडौं । पूर्वराजा ज्ञानेन्द्र शाह शुक्रबार झापाबाट काठमाडौं आइपुगेका छन्। उनी त्रिभुवन अन्तर्राष्ट्रिय विमानस्थलमार्फत काठमाडौं आउँदा उनको स्वागतका लागि समर्थकहरु ठूलो संख्यामा गोल्डेन गेटमा उपस्थित भएका छन् ।
राष्ट्रिय प्रजातन्त्र पार्टी (राप्रपा) तथा दुर्गा प्रसाई नेतृत्वको ‘राष्ट्र, राष्ट्रियता, धर्म, संस्कृति तथा नागरिक बचाउ महाअभियान’ सहित विभिन्न राजावादी समूहहरूले ज्ञानेन्द्र शाहको स्वागका लागि विमानस्थल क्षेत्रमा उपस्थित हुन आह्वान गरेका थिए। सोही आह्वानअनुसार समर्थकहरूको उल्लेख्य उपस्थिति देखिएको हो । उनीहरुले विमानस्थलभित्रै प्रवेश गर्न खोजेपनि स्थानीय प्रशासनले निषेधाज्ञा जारी गरेर ठूलो संख्यामा सुरक्षाकर्मी तैनाथ गरेको छ । विमानस्थल प्रवेशद्वार नजिकै केही समय भीड बढेपछि सुरक्षा व्यवस्था कडा पारिएको थियो।
राजासमर्थक प्रदर्शनकारीहरूले राजसंस्था पुनर्स्थापनाको माग गर्दै नाराबाजी गरेका छन् भीडका कारण विमानस्थल आसपासको सडक क्षेत्रमा सवारी आवागमन प्रभावित हुँदा आन्तरिक तथा अन्तर्राष्ट्रिय उडानका यात्रुहरू समयमै टर्मिनलसम्म पुग्न कठिनाइमा परेको छ ।
बाहिरी सडक क्षेत्रमा भएको अवरोधका कारण भने यात्रुहरूले असहजता भोग्नुपरेको बताइएको छ।
पूर्वराजा ज्ञानेन्द्र पछिल्लो समय देशका विभिन्न जिल्लामा धार्मिक तथा सामाजिक कार्यक्रमहरूमा सहभागी हुँदै आएका छन्।
प्रतिक्रिया