लोकप्रियतावादको भ्रमबाट सचेत रहन एमालेको आह्वान

काठमाडौं । नेकपा (एमाले)ले लोकप्रियतावादको प्रभावबाट सचेत रहन आग्रह गरेको छ।

एमालेका प्रेस संयोजक मीनबहादुर शाहीले आज विज्ञप्ति जारी गर्दै आगामी फागुन २१ गते हुने निर्वाचनका सन्दर्भमा मतदातालाई सचेत बन्न आग्रह गरेका हुन् ।

उनले लोकतान्त्रिक अभ्यास र राष्ट्रको दीर्घकालीन हितमाथि क्षणिक तथा भावनात्मक नाराले असर पार्न सक्ने भन्दै विवेकपूर्ण निर्णय गर्न अपिल गरेका छन् ।

एमालेले राजनीतिमा देखिने लोकप्रियतावाद प्रायः भ्रमपूर्ण हुने र त्यसले नीति निर्माण, स्थायित्व र सुशासनमा नकारात्मक प्रभाव पार्ने जोखिम रहने स्पष्ट पारेको छ। पार्टीका अनुसार भावनामा आधारित अल्पकालीन आकर्षणले दीर्घकालीन विकास र समृद्धिको मार्ग अवरुद्ध गर्न सक्छ।

विज्ञप्तिमा विश्वका धेरै देशहरू तथा दक्षिण एसियाका केही मुलुकहरूले लोकप्रियतावादका कारण जटिल अवस्था सामना गरिरहेको उदाहरण प्रस्तुत गर्दै नेपालले त्यसबाट पाठ सिक्नुपर्ने उल्लेख गरिएको छ।

एमालेले सबै मतदातालाई विचार, सिद्धान्त, तथ्य, अनुभव र राष्ट्रिय हितलाई केन्द्रमा राखेर आफ्नो मताधिकार प्रयोग गर्न आग्रह गरेको छ। दीर्घकालीन स्थायित्व, विकास र समृद्धिको मार्ग रोज्नु नै राष्ट्र र जनताको हितमा हुने पार्टीको विश्वास छ।