रुकुम पूर्व । नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ पुथा उत्तरगंगा गाउँपालिको तकसेरा पुगेका छन् । प्रतिनिधि सभा ससदस्य निर्वाचनमा रुकुम पूर्वबाट उम्मेदवार रहेका प्रचण्ड मतदाता भेटघाटका लागि शनिबार साँझ तकसेरा पुगेका हुन् ।
संयोजक प्रचण्डलाई तकसेरामा स्थानीयले स्वागत गरेका छन्। स्वागतमा आएका जनतालाई संक्षिप्त संबोधन गर्दै प्रचण्डले रुकुम पूर्वका जनताबाट नयाँ उर्जा प्राप्त भइरहेको बताए । रुकुमबाट समाजवादी मोडल सुरु गर्ने बताउँदै प्रचण्डले रुकुम क्रान्तिको सुरुआत गर्ने र शान्ति यात्राको निर्णय स्थान भएको बताए ।
संयोजक प्रचण्डले आफ्नो पहलमा संविधानमा विशेष तथा स्वायत्त अधिकार संस्थागत गरिएको बताउँदै संविधानको मर्मअनुसार मगर क्लस्टरहरूलाई स्वायत्त क्षेत्र घोषणा गरी ‘खाम मगर’ सभ्यताको विश्वव्यापी ब्रान्डिङ गर्ने बताए । उनले यसबाट मगर सभ्यताको संरक्षण हुनुका साथै चौतर्फी विकास पनि हुने बताए ।
प्रतिक्रिया