बुटवल उपमहानगरपालिकाको ६७ औँ स्थापना दिवसमा नगर प्रमुख पाण्डेयको शुभकामना : समृद्ध शहर निर्माणमा सबैको सहकार्य आवश्यक

बुटवल । बुटवल उपमहानगरपालिकाको ६७ औँ स्थापना दिवसको अवसरमा नगर प्रमुख खेलराज पाण्डेयले शुभकामना व्यक्त गर्दै समृद्ध, व्यवस्थित र नागरिकमैत्री शहर निर्माणका लागि सबैको सहकार्य आवश्यक रहेको बताएका छन् ।

नगर प्रमुख पाण्डेयले सामाजिक सञ्जालमार्फत शुभकामना सन्देश जारी गर्दै उपमहानगरपालिकाले सुशासनको अनुभूति दिलाउने, व्यवसायिक क्षेत्रमा आशालाग्दो वातावरण सिर्जना गर्ने तथा शिक्षा, स्वास्थ्य, उद्योग, कृषि र पर्यटनका क्षेत्रमा उल्लेखनीय परिवर्तन गर्ने लक्ष्यका साथ अघि बढिरहेको उल्लेख गरेका छन् ।

उनले बुटवललाई देशकै सबैभन्दा समृद्ध शहरका रूपमा विकास गर्न सामूहिक प्रयास अपरिहार्य रहेको बताएका छन् । “हामी सबै मिलेर सुशासनयुक्त, समृद्ध र अवसरयुक्त शहर निर्माण गर्न सक्छौँ,” उनले सन्देशमा उल्लेख गरेका छन् ।

नगर प्रमुख पाण्डेयले उपमहानगरपालिका सम्पूर्ण बुटवलवासीको साझा तथा अभिभावकीय संस्था भएको उल्लेख गर्दै नागरिकमा अपनत्वको भावना विकास गर्न स्थानीय सरकार प्रतिबद्ध रहेको जनाएका छन् । उपमहानगरपालिकाले नागरिकको विश्वास जित्दै सेवा प्रवाहलाई थप प्रभावकारी बनाउने दिशामा निरन्तर काम गरिरहेको उनले बताएका छन् ।

स्थापना दिवसलाई ऐतिहासिक क्षणका रूपमा स्मरण गर्दै उनले सम्पूर्ण बुटवलवासीमा हार्दिक शुभकामना व्यक्त गरेका छन् । साथै आगामी दिनमा बुटवललाई आर्थिक, शैक्षिक, स्वास्थ्य, कृषि तथा पर्यटनका दृष्टिले नमूना शहर बनाउने अभियानमा सबैको साथ, सहयोग र सहभागिता आवश्यक रहेको उनले जोड दिएका छन् ।