देवदह । रुपन्देही निर्वाचन क्षेत्र नम्बर-१ का मतदाताले नेपाली कांग्रेसका प्रतिनिधिसभा सदस्य उम्मेदवार हिराबहादुर खत्रीलाई आगामी निर्वाचनमा विजयी गराउनुपर्ने धारणा व्यक्त गरेका छन् । कृषक, व्यवसायी तथा विकासप्रेमी युवा नेताका रूपमा खत्रीले आफ्नो क्षेत्रको विकासमा महत्वपूर्ण भूमिका खेल्न सक्ने विश्वास मतदाताले व्यक्त गरेका हुन् ।
सोमबार तिलोत्तमा नगरपालिकाका वडा नम्बर-१५ र १६ का विभिन्न टोल तथा बस्तीमा आयोजित घरदैलो कार्यक्रममा सहभागी भएका खत्रीलाई मतदाताले विजयीको शुभकामना तथा आशीर्वाद दिएका थिए । मतदाताले स्थानीय क्षेत्रको आवश्यकता र समस्या बुझ्ने स्थायी उम्मेदवार नै विकासका लागि उपयुक्त हुने भन्दै खत्रीलाई समर्थन गर्ने प्रतिबद्धता जनाएका थिए ।
घरदैलोका क्रममा मतदाताले पर्यटक वा बाहिरी उम्मेदवारभन्दा स्थानीय समस्यासँग परिचित नेतृत्व आवश्यक रहेको बताएका थिए । उनीहरूले कांग्रेसको लामो राजनीतिक इतिहास र वर्तमानमा युवामुखी परिवर्तनका कारण देशको विकास र निकासका लागि कांग्रेस नै उपयुक्त विकल्प भएको विश्वास व्यक्त गरेका थिए ।
उक्त अवसरमा उम्मेदवार खत्रीले मतदाताको भावना र सुझावलाई आफ्नो प्राथमिकतामा राख्दै क्षेत्रको समग्र विकासका लागि प्रतिबद्ध रहेको बताए । उनले क्षेत्र नम्बर-१ मा कृषि र पर्यटन क्षेत्रको पर्याप्त सम्भावना रहेको उल्लेख गर्दै स्थानीय कृषक तथा समुदायको आवश्यकताअनुसार कार्यक्रम र योजना ल्याउने बताए ।
निर्वाचन परिचालन सचिवालय समिति संयोजक विजय गुरुङका अनुसार क्षेत्र नम्बर-१ अन्तर्गतका विभिन्न पालिकामा घरदैलो कार्यक्रम तथा मतदातासँग प्रत्यक्ष संवाद गर्ने अभियान निरन्तर जारी रहेको छ ।
प्रतिक्रिया