मध्यपूर्वको मिसाइल आक्रमणले चिन्तित बने ओली, ‘नेपालीको सुरक्षाले निद्रा हरायो’

काठमाडौं । पूर्वप्रधानमन्त्री तथा नेकपा एमालेका अध्यक्ष केपी शर्मा ओलीले मध्यपूर्वका देशहरूमा भइरहेको मिसाइल आक्रमण र त्यसबाट उत्पन्न परिस्थितिप्रति गहिरो चिन्ता व्यक्त गरेका छन् । ती देशहरूमा ठूलो संख्यामा नेपाली नागरिक रहेका कारण आफूलाई रातभर निद्रा नलागेको उनले बताएका छन् ।

अमेरिका र इजरायलले संयुक्त रूपमा इरानमाथि आक्रमण गरेपछि इरानले प्रत्याक्रमणस्वरूप अमेरिकी सैन्य अड्डाहरूलाई लक्षित गर्दै मिसाइल प्रहार गरेको थियो । उक्त घटनापछि कतार, बहराइन, संयुक्त अरब इमिरेट्स, कुवेत तथा इजरायललगायतका देशहरूमा त्रासको वातावरण सिर्जना भएको छ ।

सोही घटनालाई लिएर अध्यक्ष ओलीले सामाजिक सञ्जालमार्फत आफ्नो धारणा सार्वजनिक गरेका हुन् । उनले लेखेका छन्, “मध्यपूर्वका देशहरूको आकाशमा बर्सिएका मिसाइलको धुवाँले आज निद्रा परेको छैन । ती देशहरूमा लाखौं नेपाली आपत र त्रासको अवस्थामा छन्, यहाँ उनीहरूका परिवार पनि चिन्तामा छन् ।”

उनले नेपाली नागरिकको अवस्थाप्रति आफू बेचैन रहेको उल्लेख गर्दै वर्तमान परिस्थितिमा सजगता, धैर्य र विवेक आवश्यक रहेको बताएका छन् । “आज तपाईंहरू छट्पटाइरहँदा म निदाउन सकिनँ, बेचैन छु। यसबेला हामी सबैले धैर्य र साहस कायम राख्नुपर्छ,” उनले उल्लेख गरेका छन् ।

मध्यपूर्वका मुलुकहरू भूराजनीतिक द्वन्द्वको चपेटामा परेको उल्लेख गर्दै ओलीले ती देशहरू युद्ध चाहँदैनथे, तर शक्तिराष्ट्रहरूको स्वार्थका कारण द्वन्द्वको अवस्था सिर्जना भएको टिप्पणी गरेका छन् । साथै, नेपालमा यस्तो अवस्था नआओस् भन्ने कामना समेत उनले व्यक्त गरेका छन् ।

ओलीले मध्यपूर्वका विभिन्न देशहरूमा कार्यरत नेपाली नागरिकलाई सुरक्षित र सजग रहन आग्रह गर्दै त्यहाँ रहेका नेपाली दूतावास र नेपाल सरकारलाई नेपाली नागरिकको सुरक्षाका लागि आवश्यक कदम तत्काल चाल्न अनुरोध गरेका छन् ।