काठमाडौं । गत भदौ २३ र २४ गते भएका घटनाबारे गठित जाँचबुझ आयोगले आफ्नो प्रतिवेदन सरकारलाई बुझाउँदै गल्ती गर्ने व्यक्तिहरूमाथि कारबाही गर्न सिफारिस गरेको जनाएको छ।
आयोगका सदस्य तथा प्रवक्ता विज्ञानराज शर्माले प्रधानमन्त्री सुशीला कार्कीलाई प्रतिवेदन बुझाएपछि सञ्चारकर्मीसँग कुरा गर्दै आयोगले घटनासँग सम्बन्धित तथ्यहरूको विस्तृत अध्ययन गरी प्रमाणका आधारमा सुझाव र सिफारिस पेश गरेको बताए।
उनले कस–कसलाई कस्तो प्रकृतिको कारबाही सिफारिस गरिएको हो भन्ने विषय भने सार्वजनिक गरेनन्। “हामीले २३ र २४ गते भएका घटनाबारे तथ्य खोज्ने प्रयास गरेका छौं। प्राप्त प्रमाणका आधारमा राय र सुझाव दिएका छौं। अब सरकारले त्यसलाई आफ्नो जिम्मेवारीका रूपमा लिएर आवश्यक कारबाही गर्छ,” उनले भने।
प्रवक्ता शर्माका अनुसार घटनामा संलग्न भई गल्ती गर्नेहरूलाई कारबाही हुनेछ भने निर्दोष व्यक्तिहरूलाई कारबाही नहुने उनले स्पष्ट पारे।
उनले विशेषगरी भदौ २३ गतेको घटनामा सुरक्षातर्फ गम्भीर कमजोरी देखिएको पनि बताए। “त्यो दिन सुरुदेखि नै सुरक्षामा कमजोरी देखियो। ब्यारिकेड व्यवस्थापनदेखि नै सुरक्षात्मक चुकहरू भएका थिए,” उनले भने।
प्रतिक्रिया