धनगढी । कैलाली मा एक युवकले आफ्नै श्रीमतीको गोली हानी हत्या गरेका छन् ।
गोदावरी नगरपालिका-४, अमलेशैनी गाउँका अन्दाजी ३१ वर्षीय रामबहादुर मगरले जंगलमा बाख्रा चराउन गएका बेला २८ वर्षीया श्रीमती संजिता मगरको हत्या गरेको प्रहरीले जनाएको छ ।
जिल्ला प्रहरी कार्यालय कैलालीका निमित्त प्रमुख प्रहरी नायब उपरीक्षक (डीएसपी) योगेन्द्र तिमिल्सिनाका अनुसार विवादका क्रममा रामबहादुरले आफूसँग रहेको भरुवा बन्दुक प्रयोग गरी श्रीमतीमाथि गोली प्रहार गरेका थिए ।
श्रीमतीको हत्या गरेपछि उनले सोही बन्दुक प्रयोग गरी आफैंमाथि पनि गोली प्रहार गरेको प्रहरीले जनाएको छ । घाइते अवस्थामा रहेका रामबहादुरको सेती प्रादेशिक अस्पतालमा उपचार भइरहेको छ ।
मृतक संजिताको शव घटनास्थलमै रहेको र माइती पक्ष आएपछि आवश्यक कानुनी प्रक्रिया अघि बढाइने प्रहरीले जनाएको छ । घटनाबारे थप अनुसन्धान भइरहेको छ ।
प्रतिक्रिया