काठमाडौं । पूर्वप्रधानमन्त्री तथा नेपाल कम्युनिष्ट पार्टी (एमाले) का अध्यक्ष केपी शर्मा ओली र पूर्वगृहमन्त्री तथा नेपाली कांग्रेसका नेता रमेश लेखकलाई आइतबार काठमाडौं जिल्ला अदालतमा उपस्थित गराइने भएको छ । शनिबार बिहान पक्राउ परेका दुवै नेतालाई म्याद थपका लागि अदालतमा पेश गर्न लागिएको हो ।
गत भदौमा भएको ‘जेनजी’ आन्दोलन हिंसात्मक बनेपछि भएको मानवीय तथा भौतिक क्षतिको छानबिन गर्न गठित गौरीबहादुर कार्की आयोगले दोषी ठहर गरेपछि उनीहरूलाई नियन्त्रणमा लिइएको हो । बालेन्द्र शाह नेतृत्वको सरकारले उक्त प्रतिवेदन कार्यान्वयन गर्ने निर्णय गरेसँगै पक्राउ प्रक्रिया अघि बढाइएको थियो ।
प्रहरीका अनुसार शनिबार बिहान जरुरी पक्राउ पुर्जी देखाएपछि ओली आफ्नै गाडीमा प्रहरी परिसर पुगेका थिए । उनले आफ्नो पक्राउलाई राज्यको प्रतिशोध भएको टिप्पणी गरेका छन् ।
प्रहरी प्रवक्ता अविनारायण काफ्लेका अनुसार ओलीलाई चिकित्सकको सल्लाहअनुसार त्रिवि शिक्षण अस्पतालमा राखिएको छ भने लेखकलाई महाराजगञ्जस्थित दुई नम्बर गणमा राखिएको छ ।
उनीहरूमाथि मुलुकी अपराध संहिताअन्तर्गत ज्यानसम्बन्धी कसुर (लापरबाही तथा हेलचेक्य्राइँ गरी ज्यान मारेको) सम्बन्धी मुद्दामा अनुसन्धान अघि बढाइएको प्रहरीले जनाएको छ ।
यसैबीच, गृहमन्त्री सुधन गुरुङ ले सामाजिक सञ्जालमार्फत उक्त पक्राउ प्रतिशोध नभई न्यायको सुरुवात भएको दाबी गरेका छन् । उनले कानुनभन्दा माथि कोही नभएको उल्लेख गर्दै जेनजी आन्दोलनका पीडितलाई न्याय दिलाइने बताएका छन् ।
यता एमालेले भने आफ्ना अध्यक्षको पक्राउलाई ‘नियोजित र निर्देशित’ भन्दै तत्काल रिहाइको माग गर्दै विरोध जनाइरहेको छ ।
प्रतिक्रिया