काठमाडौं । समानान्तर गतिबिधिमा सक्रिय नेपाली कांग्रेसको संस्थापनइतर समूहले आयोजना गर्ने भनिएको जिल्ला सभापतिहरूको भेला स्थगित गरिएको छ ।
विशेष महाधिवेशनको विपक्षमा रहेका देउवा र शेखर कोइराला समूहका नेताहरूको बैठकले सभापतिहरूको जिल्ला भेला स्थगित गरेको हो । निवर्तमान कार्यवाहक सभापति पूर्णबहादुर खड्काले कार्यबाहक सभापति कै हैसियतमा १४ औं महाधिवेशनबाट निर्वाचित पदाधिकारी र केन्द्रीय सदस्यहरूको दुई दिने बैठक बोलाएका थिए । शेखर कोइराला समूहको बिरोध पछि बैठकलाई अनौपचारिक भेला भनिएको थियो ।
सोही समूहले आज (बिहीबार)का लागि जिल्ला सभापतिहरूको भेला बोलाइएको सूचना बाहिरिए पनि तत्कालका लागि भेला स्थगित गरिएको बैठकमा सहभागी नेताहरूले बताएका छन् ।
सर्वोच्च अदालतमा पार्टीको आधिकारिताका विषयमा २२ चैतमा तोकिएको पेसीलाई मध्यनजर गर्दै भेला स्थगित गरिएको बताइएको छ ।
उता संस्थापन पक्ष बनेको नेपाली कांग्रेसले भने अनुशासन समिति मार्फत समानान्तर गतिबिधि गर्ने नेताहरुलाई सचेत गराएको छ । समितिले गतिबिधि जारी रहे अनुशासनको कारवाहीको तयारीमा संस्थापन पक्षका नेताहरु जुटेका छन् ।
प्रतिक्रिया