नेपालगन्ज । बाँकेको नेपालगन्ज बसपार्कमा दिनदहाडै यात्रुबाहक बस भित्रबाट हतियार देखाएर यात्रु लुट्ने समूह लुटपात गरेको २ दिन नपुग्दै प्रहरीको फन्दामा परेको छ । नेपालगन्ज ४ बसपार्कमा यात्रुहरूलाई हातहतियार देखाएर डाँका चोरी घटनामा संलग्न चार जनालाई प्रहरीले पक्राउ गरेको हो ।
जिल्ला प्रहरी कार्यालय बाँकेका अनुसार मंगलबार नेपालगन्जबाट काठमाडौँ जाने रात्रीबसमा सवार चार जना यात्रुमाथि ६र७ जनाको हतियारधारी समूहले कुटपिट गर्दै नगद तथा जिन्सी सामान लुटपाट गरेको थियो । उक्त समूहले पीडितहरूबाट नगद ५९ हजार रुपैयाँ र मोबाइल तथा अन्य सामान जबरजस्ती खोसेर फरार भएका थिए ।
घटनाबारे जानकारी प्राप्त खोजतलास तीव्र पारेको प्रहरीले बुधबार घटनामा संलग्न चार जनालाई नियन्त्रणमा लिएको बाँके प्रहरीले जनाएको छ । पक्राउ परेकाहरूबाट घटनामा प्रयोग गरिएको कटुवा पेस्तोल र खुकुरी समेत बरामद गरिएको छ ।
पक्राउ पर्नेहरूमा नेपालगन्ज उपमहानगरपालिका–१९ का २४ वर्षीय रामु परियार, वडा नम्बर ४ का २८ वर्षीय सुवास बिष्ट, २६ वर्षीय संजय क्षेत्री तथा कोहलपुर नगरपालिका–५ का १९ वर्षीय सन्दीप जंग क्षेत्री रहेको बाँके प्रहरीले जनाएको छ ।
प्रहरीले घटनामा संलग्न अन्य फरार व्यक्तिहरूको खोजी कार्य जारी रहेको तथा पक्राउ परेकामाथि आवश्यक अनुसन्धान भइरहेको प्रहरीले जनाएको छ ।
प्रतिक्रिया