कांग्रेस इतर समूहको बैठक बस्दै

काठमाडौं । नेपाली कांग्रेसका निवर्तमान कार्यवाहक सभापति पूर्णबहादुर खड्काले बोलाएको आफू पक्षीय केन्द्रीय सदस्यहरूको बैठक आज बस्दैछ ।

बैठक मध्याह्न १२ बजे धुम्बाराहीस्थित एक होटलमा बस्ने तय भएको छ । सर्वोच्च अदालतको फैसलापछि पार्टीको आधिकारिकता सम्बन्धी विषय स्पष्ट बनेसँगै खड्का समूह भावी रणनीति तय गर्न जुटेको हो ।

बैठकमा १५ औँ महाधिवेशनको तयारीमा अघि बढ्ने वा अलग बाटो रोज्ने भन्ने विषयमा मुख्य छलफल हुने जनाइएको छ । सर्वोच्च अदालतले विशेष महाधिवेशनलाई मान्यता दिएपछि असन्तुष्ट देखिएको यो समूहले शनिबार खड्काको निवासमा प्रारम्भिक छलफल गरेको थियो ।

उक्त छलफलमा विमलेन्द्र निधि, डा. शशांक कोइराला, कृष्ण सिटौला, प्रकाशमान सिंह, डा. प्रकाशशरण महत, एनपी साउद, मीन विश्वकर्मा र रमेश लेखक लगायतका नेताहरू सहभागी भएका थिए ।