काठमाडौं । नेपाली कांग्रेसका निवर्तमान सभापति शेरबहादुर देउवा समूहले पार्टीको १५औँ महाधिवेशन छुट्टै प्रक्रियाबाट अघि बढाउने निर्णय गरेको छ ।
सोमबार महाराजगञ्जस्थित देउवा निवासमा बसेको समूहको बैठकले कांग्रेस केन्द्रीय कार्यसम्पादन समितिको पछिल्लो निर्णय अस्वीकार गर्दै आफ्नै महाधिवेशन प्रक्रिया अघि बढाउने निष्कर्ष निकालेको हो ।
कांग्रेस केन्द्रीय कार्यसम्पादन समितिको आइतबार बसेको बैठकले १५औँ महाधिवेशनमा सहभागी हुन देउवा समूहलाई आह्वान गर्दै १४औँ महाधिवेशनबाट निर्वाचित केन्द्रीय समितिका सदस्यलाई वर्तमान कार्यसमितिमा समेट्ने निर्णय गरेको थियो । तर, देउवा समूहले उक्त प्रस्ताव अस्वीकार गरेको हो ।
बैठकपछि देउवा समूहका नेता प्रकाशशरण महतले महाधिवेशनको पूर्वसन्ध्यामा गरिएको यस्तो आह्वानको औचित्यमाथि प्रश्न उठाए । वडा अधिवेशन सुरु हुन चार दिन मात्र बाँकी रहेका बेला गरिएको प्रस्ताव स्वीकार गर्न नसकिने उनको भनाइ छ ।
महतका अनुसार देउवा समूहले यसअघि प्रस्ताव गरेको १५औँ महाधिवेशनको कार्यतालिकाअनुसार नै प्रक्रिया अघि बढाउने निर्णय गरेको छ ।
संस्थापन पक्षले गरेको निर्णयबारे अनौपचारिक छलफल भएको र समूहको औपचारिक धारणा सार्वजनिक गर्न सोमबार अपराह्न ४ बजे पत्रकार सम्मेलन गर्ने तयारी रहेको महतले जानकारी दिए ।
देउवा समूहले संस्थापन पक्षको प्रस्ताव अस्वीकार गर्दै छुट्टै महाधिवेशनको प्रक्रिया अघि बढाउने निर्णय गरेसँगै नेपाली कांग्रेसभित्रको विवाद थप गहिरिएको छ । यसले पार्टी विभाजनकै अवस्थासम्म पुग्ने सम्भावना बढाएको नेताहरूले बताएका छन् ।
प्रतिक्रिया