काठमाडौं । टी-२० अन्तर्राष्ट्रिय सिरिजअन्तर्गत दोस्रो खेलमा नेपालले यूएईविरुद्ध शानदार जित निकाल्दै सिरिज बराबरी गरेको छ । त्रिभुवन अन्तर्राष्ट्रिय क्रिकेट मैदानमा सम्पन्न खेलमा नेपालले यूएईलाई ८ विकेटले पराजित गरेको हो ।
१२९ रनको लक्ष्य पछ्याएको नेपालले १५.५ ओभरमै दुई विकेट गुमाएर लक्ष्य पूरा गर्यो । नेपालका लागि ओपनर कुशल भुर्तेलले उत्कृष्ट प्रदर्शन गर्दै अर्धशतक प्रहार गरे । उनले ५७ बलमा १२ चौका र २ छक्कासहित ८२ रन बनाए ।
कप्तान दीपेन्द्र सिंह ऐरीले २३ रन जोड्दा कुशल मल्लले १९ रन बनाए । राष्ट्रिय टोलीमा डेब्यू गरेका सन्तोष यादव भने १ रनमा आउट भए ।
यसअघि टस हारेर पहिले ब्याटिङ गरेको यूएईले निर्धारित २० ओभरमा ८ विकेट गुमाउँदै १२८ रन बनाएको थियो ।
नेपालका सन्दीप लामिछानेले उत्कृष्ट बलिङ गर्दै ४ ओभरमा १ मेडनसहित मात्र ६ रन खर्चिएर ३ विकेट लिए । हेमन्त धामीले २ विकेट लिँदा नन्दन यादव र शाहब आलमले समान १-१ विकेट लिए ।
यूएईका अक्षदीप नाथले ५३ रन बनाउँदा मुहम्मद अरफानले ३२ र अदीम उस्मानीले ३० रनको योगदान दिएका थिए ।
यसअघि पहिलो खेलमा नेपाल ६ विकेटले पराजित भएको थियो । दोस्रो खेलमा जित निकाल्दै नेपालले सिरिज १-१ को बराबरीमा ल्याएको छ ।
प्रतिक्रिया