काठमाडौं । नेपाली कम्युनिस्ट पार्टी (नेकपा)का संयोजक पुष्पकमल दाहाल ‘प्रचण्ड’ले वामपन्थी आन्दोलनको पुनर्गठनका लागि संकल्प लिन आह्वान गरेका छन् । नेकपाको ७७औँ स्थापना दिवस तथा लेनिन जयन्तीका अवसरमा शुभकामना सन्देश जारी गर्दै उनले यस्तो बताएका हुन् ।
प्रचण्डले समाजवाद र साम्यवादको लक्ष्य बोकेका सबै वामपन्थी तथा कम्युनिस्ट शक्तिहरूबीच एकता आजको आवश्यकता भएको उल्लेख गरेका छन् । “समाजवाद र साम्यवादको लक्ष्य बोकेका सबै शक्तिहरूबीच एकता आजको ऐतिहासिक आवश्यकता बनेको छ,” उनले भनेका छन् ।
उनका अनुसार कम्युनिस्ट आन्दोलनले मात्र उपेक्षित र उत्पीडित समुदायको अधिकार तथा राष्ट्रिय स्वाधीनताको रक्षा गर्न सक्ने इतिहासले प्रमाणित गरेको छ ।
शान्ति सम्झौता र लोकतान्त्रिक गणतन्त्रको रक्षा तथा विकासका लागि पक्षधर शक्तिहरूबीच मोर्चाबन्दी अपरिहार्य रहेकोमा उनले जोड दिएका छन् ।
प्रचण्डले विगतका संघर्षबाट प्राप्त उपलब्धिहरूको रक्षा गर्दै गरिब, किसान र श्रमजीवी वर्गको पक्षमा आन्दोलन अघि बढाउने जिम्मेवारी अझ बढेको बताए । साथै, कम्युनिस्ट आन्दोलनको समग्र पुनर्गठनका लागि नयाँ ढंगले अघि बढ्नुपर्ने आवश्यकता औंल्याएका छन् ।
वि.सं. २००६ वैशाख ९ (२२ अप्रिल १९४९) मा सामन्तवाद र साम्राज्यवादविरुद्ध जनवादी सत्ता स्थापना गर्ने उद्देश्यसहित नेपाल कम्युनिस्ट पार्टी स्थापना भएको थियो ।
प्रतिक्रिया