काठमाडौं । आईसीसी क्रिकेट विश्वकप लिग-२ अन्तर्गत आज नेपाल र ओमानबीच महत्वपूर्ण एकदिवसीय खेल हुँदैछ । खेल त्रिवि क्रिकेट मैदानमा बिहान साढे ९ बजेदेखि सुरु हुनेछ ।
जारी सिरिजमा नेपालले पहिलो खेलमा यूएईलाई पराजित गर्दै विजयी सुरुआत गरेको छ भने ओमानले आफ्नो पहिलो खेलमा यूएईसँग हार बेहोरेको थियो । यस खेल दुवै टोलीका लागि अंकतालिकामा सुधार गर्ने महत्वपूर्ण अवसरका रूपमा हेरिएको छ ।
लिग–२ को हालसम्मको अवस्थाअनुसार नेपालले २१ खेलमा १४ अंक जोड्दै सातौं स्थानमा रहेको छ । ओमान भने २५ खेलमा २९ अंकसहित तेस्रो स्थानमा छ । दुवै टोलीबीच एकदिवसीय अन्तर्राष्ट्रिय क्रिकेटमा हालसम्म ८ पटक प्रतिस्पर्धा हुँदा ओमानले ५ र नेपालले ३ खेल जितेको छ ।
नेपाली टोलीको कप्तानी रोहित पौडेल ले सम्हाल्नेछन् भने उपकप्तानमा दीपेन्द्र सिंह ऐरी रहेका छन् । टोलीमा कुशल भुर्तेल, आसिफ सेख, भीम सार्की, आरिफ सेख, बसिर अहमद, गुलशन झा, सोमपाल कामी, सन्दीप लामिछाने, ललित राजवंशी, विनोद भण्डारी, नन्दन यादव, अर्जुन कुमाल र करण केसी समावेश छन् ।
मे ५ सम्म सञ्चालन हुने यस त्रिकोणात्मक सिरिजमा नेपाल, ओमान र यूएईले एक-अर्काविरुद्ध दुई-दुई खेल खेल्ने तालिका रहेको छ । तालिकाअनुसार मे १ मा नेपाल-यूएई, मे ३ मा ओमान-यूएई र मे ५ मा पुनः नेपाल-ओमानबीच प्रतिस्पर्धा हुनेछ ।
प्रतिक्रिया