काठमाडौँ । सरकारले लिपुलेक क्षेत्र नेपालको अभिन्न भू–भाग भएको प्रष्टीकरण दिएको छ । परराष्ट्र मन्त्रालयले आज विज्ञप्ति जारी गर्दै महाकाली नदीपूर्वका लिम्पियाधुरा, लिपुलेक र कालापानी नेपालकै भू–भाग भएको स्पष्ट पारेको हो ।
मन्त्रालयले ६ बुँदे विज्ञप्ति जारी गर्दै सन् १८१६ को सुगौली सन्धि अनुसार महाकाली नदीपूर्वका लिम्पियाधुरा, लिपुलेक र कालापानी नेपालकै भू–भाग भएकोमा सरकार अडिग रहेको जनाएको छ ।
नेपाली भूमि लिपुलेक हुँदै आयोजना हुने भनिएको यात्राका सम्बन्धमा नेपालले आफ्नो स्पष्ट अडान भारत र चीन दुवै पक्षलाई पुनः अवगत गराएको छ । विज्ञप्तिमा उल्लेख गरिएको छ ।
परराष्ट्रले उक्त क्षेत्रमा सडक निर्माण, व्यापार वा तीर्थाटन जस्ता कुनै पनि क्रियाकलाप नगर्न भारतलाई निरन्तर आग्रह गर्दै आएको र यसबारे चीनलाई पनि आधिकारिक रूपमा जानकारी गराइसकिएको पनि स्पष्ट पारेको छ ।
भारतको विदेश मन्त्रालयले चीनको समन्वयमा आगामी जुनदेखि अगस्ट २०२६ सम्म लिपुलेक भन्ज्याङ र सिक्किमको नाथुला नाका हुँदै मानसरोवर यात्रा गराउने घोषणा अप्रिल ३० मा गरेको थियो ।
प्रतिक्रिया