काठमाडौं । नेकपा (एमाले)को केन्द्रीय सचिवालय बैठक आज बस्दैछ।
बैठक अध्यक्ष केपी शर्मा ओलीको भक्तपुरस्थित गुण्डु निवासमा दिउँसो १ बजेका लागि बोलाइएको छ।
यसअघि गत शनिबारका लागि तय गरिएको बैठक तयारी अपूरो रहेको भन्दै स्थगित गरिएको थियो।
पार्टीका केन्द्रीय कार्यालय सचिव भीष्मराज अधिकारीका अनुसार बैठकको मुख्य एजेन्डा नेताहरूको कार्यविभाजन रहेको छ।
पार्टीको ११औँ महाधिवेशन सम्पन्न भएको लामो समय बितिसक्दा पनि नेताहरूको कार्यविभाजन हुन नसकेकाले आजको बैठक यस विषयमा केन्द्रित हुने बताइएको छ।
बैठकमा केन्द्रीय सदस्यहरूलाई पालिकास्तरसम्म जिम्मेवारी दिएर खटाउने विषयमा छलफल हुनेछ । यस्तै प्रत्येक केन्द्रीय सदस्यलाई कुनै न कुनै स्थानीय तहको इञ्चार्ज तोकी आगामी स्थानीय तह निर्वाचनलाई लक्षित गर्दै संगठन सुदृढीकरणमा सक्रिय बनाइने बताइएको छ। साथै, केन्द्रीय विभाग र विभिन्न निकायहरूमा समेत जिम्मेवारी बाँडफाँट गरिने तयारी छ।
बैठकले गत २१ फागुनमा सम्पन्न निर्वाचनको समीक्षा गर्न केन्द्रीय कमिटी बैठकको मिति पनि तय गर्ने जनाइएको छ।
प्रतिक्रिया