काठमाडौं । नेकपा एमालेको सचिवालय बैठक पार्टी केन्द्रीय कार्यालय च्यासलमा सुरु भएको छ। दिउँसो १ बजेका लागि बोलाइएको बैठक पुनर्गठन कार्यदलको बैठक लम्बिएपछि केही घण्टा ढिला गरी सुरु भएको हो।
एमाले अध्यक्ष केपी शर्मा ओलीको सचिवालयका अनुसार सचिवालय बैठक अपराह्न सुरु भएको हो। यसअघि पुनर्गठन कार्यदलको बैठकले पार्टी पुनर्गठनसम्बन्धी विभिन्न प्रतिवेदनलाई एकीकृत गर्ने विषयमा सहमति जुटाउन समय लागेको थियो।
पुनर्गठन कार्यदलमा उपाध्यक्ष रामबहादुर थापा ‘बादल’, महासचिव शंकर पोखरेल र नेता प्रदीप ज्ञवालीले प्रस्तुत गरेका छुट्टाछुट्टै प्रतिवेदनलाई एकीकृत गरी साझा प्रतिवेदन तयार गर्ने सहमति भएको छ।
यसअघि पुनर्गठनसम्बन्धी प्रतिवेदनमा अध्यक्ष ओलीको राजीनामा माग्ने र विशेष महाधिवेशन बोलाउने विषय समावेश गर्ने कि नगर्ने भन्नेमा एमालेभित्र मतभेद थियो। कार्यदलमा भएको सहमतिपछि भने अध्यक्षको राजीनामा र विशेष महाधिवेशनको विषय हालको प्रतिवेदनमा समावेश नगर्ने निर्णय भएको सचिव महेश बस्नेतले जानकारी दिएका छन्।
कार्यदलले तयार पारेको संशोधित प्रतिवेदन अब सचिवालय बैठकमा पेस हुने र त्यसबारे छलफल हुने बताइएको छ।
अध्यक्ष ओलीको राजीनामा तथा विशेष महाधिवेशनको मागसम्बन्धी विषय प्रतिवेदनबाट हटाइएपछि एमालेभित्र पछिल्लो समय देखिएको नेतृत्वसम्बन्धी विवाद तत्कालका लागि केही मत्थर भएको नेताहरूले बताएका छन्।
सचिवालय बैठकमा अध्यक्ष ओलीसमेत सहभागी छन्। बैठकमा पार्टीको पछिल्लो राजनीतिक अवस्था, पुनर्गठन कार्यदलको प्रतिवेदन तथा आगामी संगठनात्मक दिशाबारे छलफल हुने अपेक्षा गरिएको छ।
कार्यदलको प्रतिवेदनमा पुनर्गठनसम्बन्धी विषयलाई तत्काल समावेश नगर्ने सहमतिसँगै एमालेभित्र नेतृत्व परिवर्तन र विशेष महाधिवेशनको बहस तत्कालका लागि सचिवालयको औपचारिक एजेन्डाबाट बाहिरिएको छ। यद्यपि, यस विषयमा पार्टीभित्रको आन्तरिक बहस भने कायमै रहने देखिन्छ।
प्रतिक्रिया