काठमाडौं । सभामुख डोलप्रसाद अर्याल प्रधानमन्त्रीलाई भेट्न सिंहदरबार पुगेका छन् । प्रतिपक्षी दलहरूले प्रधानमन्त्री वालेन्द्र शाहको उपस्थितिको माग गर्दै प्रतिनिधिसभा बैठक पटक–पटक अवरुद्ध गरेपछि सभामुख अर्याल शाहलाई भेट्न पुगेका हुन् ।
प्रतिनिधिसभाको बिहीबारको बैठकमा विपक्षी दलहरूले प्रधानमन्त्री संसद्मा उपस्थित नभएको विषय उठाउँदै अवरोध गरेपछि सभामुख अर्यालले बैठक १५ मिनेटका लागि स्थगित गरेका थिए । त्यसलगत्तै उनी प्रधानमन्त्री तथा मन्त्रिपरिषद्को कार्यालय पुगेका हुन् ।
सिंहदरबारस्थित प्रधानमन्त्री कार्यालयमा प्रधानमन्त्री शाह र सभामुख अर्यालबीच करिब आधा घन्टा छलफल भएको थियो । सभामुखको सचिवालयका अनुसार भेटवार्तामा समसामयिक राजनीतिक परिस्थिति तथा संसद्को अवस्थाबारे छलफल भएको थियो ।
यद्यपि संसद्मा प्रधानमन्त्री उपस्थित हुने विषयमा कुनै ठोस समझदारी बनेको जानकारी भने सार्वजनिक गरिएको छैन ।
प्रधानमन्त्रीसँगको भेटपछि सभामुख अर्यालले राजनीतिक दलहरूसँग थप छलफल गर्ने तयारी गरेका छन् । विपक्षी दलहरूले प्रधानमन्त्रीको अनुपस्थितिलाई लिएर लगातार प्रश्न उठाउँदै संसद् बैठक प्रभावहीन बन्दै गएको बताएका छन् ।
प्रतिक्रिया