काठमाडौं । आईसीसी विश्वकप लिग-२ अन्तर्गत घरेलु मैदानमा जारी त्रिकोणात्मक शृङ्खलाको अन्तिम खेलमा आज नेपालले अमेरिकासँग प्रतिस्पर्धा गर्दैछ । लिग-२ (२०२३-२०२७) अन्तर्गत घरेलु मैदानको अन्तिम खेलमा नेपालले शीर्ष स्थानमा रहेको अमेरिकासँग शुक्रबार बिहान ९ः३० बजे कीर्तिपुरस्थित त्रिवि क्रिकेट मैदानमा खेल्न लागेको हो ।
अघिल्लो भेटमा अमेरिकामाथि शानदार जित निकालेको नेपाल घरेलु शृङ्खलालाई सुखद् अन्त्य गर्ने लक्ष्यमा छ भने अमेरिका हारको बदला लिने योजनासहित मैदान उत्रने तयारीमा रहेको छ ।
लिग-२ मा दुवै टोलीले समान २७ खेल खेलेका छन् । अमेरिका १९ जितसहित ३८ अंक जोडेर शीर्ष स्थानमा रहेको छ भने नेपाल १० जित, १५ हार र २२ अंकसहित पाँचौं स्थानमा रहेको छ ।
विश्वकप छनोटमा स्थान बनाउन तथा एकदिवसीय मान्यता जोगाइ राख्न नेपालमाथि बाँकी खेलहरू जित्नुपर्ने दबाब रहेको छ । अमेरिका भने शीर्ष स्थान कायम राख्दै उपाधि उचाल्ने लक्ष्यमा रहेको छ ।
यसअघि कीर्तिपुरमै भएको खेलमा नेपालले अमेरिकालाई ९ विकेटले पराजित गरेको थियो । अमेरिकाले दिएको १९६ रनको लक्ष्य नेपालले ३६ ओभर ३ बलमा मात्र एक विकेट गुमाएर पूरा गरेको थियो । उक्त खेलमा नेपालको ब्याटिङ र बलिङ दुवै पक्ष प्रभावशाली देखिएको थियो ।
अघिल्लो खेलको सानदार जितले नेपाली टोलीको मनोबल उच्च बनेको छ । घरेलु समर्थकको साथ र परिचित मैदानको फाइदा उठाउँदै नेपाल लगातार दोस्रो जित निकाल्ने योजनामा छ ।
घरेलु मैदानमा जारी त्रिकोणात्मक शृङ्खलामा नेपालले हालसम्म चार खेलमध्ये दुईमा जित र एउटामा हार बेहोरेको छ । नेपाल पहिलो खेलमा स्कटल्यान्डसँग दुई रनले पराजित भएको थियो भने दोस्रो खेलमा स्कटल्यान्डलाई ६ विकेटले हराएको थियो ।
प्रतिक्रिया