नेपालगन्ज । बाँकेको नेपालगन्ज स्थित विद्युत प्राधिकारणको नेपालगन्ज वितरण केन्द्र परिषरमा आगलागी भएको छ । प्राधिकरणको कवार्ड सामान भण्डारण गरिएको क्षेत्रमा आगलागी भएको हो ।
मध्यान्ह १२ः१५ मा सुरु भएको आगलागी नेपालगन्ज उपमहानगरपालिकाको दमकल, प्रहरी, कर्मचारी र स्थानीयको सक्रियतामा करिव १ घण्टा लगाएर नियन्त्रणमा आएको प्राधिकरणको नेपालगन्ज वितरण केन्द्रका प्रमुख संजय कुमार मिश्रले जानकारी दिए ।
परिषरको कम्पाउन्ड भित्र पुराना साइकल, गाडीका टायर र कवाडी बनेको ब्याट्रीहरु भण्डारण गरेको स्थानमा आगलागी भएको उनले बताए । आगलागीबाट बहुमूल्य र काम लाग्ने कुनै उपकरणहरु नष्ट नभएको बताउँदै मिश्रले आगलागीको कारण बारे अध्ययन भइरहेको बताए ।
आगलागीबाट कालो मुस्लो धुँवा देखिएको र पटक पटक विष्फोटको आवाज आएको स्थानीयले बताएका छन् । पुराना कवार्ड ब्याट्रीहरुमा आगलागी भएका कारण पड्केको आवाज आएको हुन सक्ने कार्यालय प्रमुख मिश्रले बताए ।
आगलागी भएको खबर पाएसँगै नेपालगन्ज उपमहानगर प्रमुख प्रशान्त बिष्ट सहित जनप्रतिनिधिहरु आगलागी स्थलमा पुगेका थिए ।
प्रतिक्रिया