बर्दिया । बर्दियामा गुडिरहेको ईभी हाईसमा एकाएक आगलागी भएको छ। महेन्द्र राजमार्गको बारबर्दिया नगरपालिका(७ रम्मापुर खण्डमा गुडिरहेको अवस्थामा ईभी हाईसमा आगलागी भएको हो । आज(आइतबार) बिहान ६:५० मिनेटको समयमा आगलागी भएको प्रहरीले जनाएको छ ।
प्रहरीका अनुसार सुप. प्र. ०१-००२ ज ४३३ नम्बरको ईभी हाईस कोहलपुरदेखि कैलालीतर्फ गइरहेको अवस्थामा एक्कासि आगलागी भएको हो । आगलागी भएको ईभी हाईस कैलाली धनगढी उपमहानगरपालिका(३ का ३८ वर्षीय नरेन्द्र नेगीले चलाएका थिए ।
ईभी हाईसमा चालक र सहचालक मात्र रहेकोले कुनै मानवीय क्षति नभएको प्रहरीले जनाएको छ । ठाकुरबाबा नगरपालिकाको दमकलको सहयोगमा आगलागी भएको ईभीमा लागेको आगो निभाइएको थियो ।
गुडिरहेको अवस्थामा एक्कासि आगलागी हुँदा ईभी हाईसमा राखिएको कागजपत्र र नगद रु ४२ हजार जली नष्ट भएको जिल्ला प्रहरी कार्यालय बर्दियाका डिएसपी रेशम बोहराले जानकारी दिए ।
प्रतिक्रिया