काठमाडौं । प्रतिनिधिसभा बैठकमा राष्ट्रिय स्वतन्त्र पार्टी (रास्वपा)का सांसद जगदीश खरेलले विपक्षी दलको विरोधलाई ‘तमासा’को संज्ञा दिएपछि संसद्मा विवाद उत्पन्न भएको छ ।
उक्त अभिव्यक्तिप्रति नेपाली कम्युनिस्ट पार्टी (नेकपा) का सांसद रमेश मल्लले नियमापत्ति जनाउँदै संसद्को रेकर्डबाट हटाउन माग गरेका छन् ।
पर्यटन विधेयक २०८२ माथि विचार गरियोस् भन्ने प्रस्तावमाथिको छलफलका क्रममा रोष्ट्रममा पुगेका सांसद खरेलले विपक्षी सांसदहरूको नाराबाजी र विरोधलाई ‘तमासा’ भन्दै टिप्पणी गरेका थिए । उनले प्रधानमन्त्री संसद्प्रति उत्तरदायी हुनुपर्ने विषय उठाउँदै गरिएको विरोधलाई लक्षित गर्दै उक्त अभिव्यक्ति दिएका थिए ।
यसपछि नेकपाका सांसद रमेश मल्लले सभामुखमार्फत नियमापत्ति जनाउँदै ‘तमासा’ शब्द अपमानजनक र असंसदीय भएको दाबी गरे । उनले उक्त अभिव्यक्ति संसद्को अभिलेखबाट हटाउन माग गरे ।
सांसद मल्लले विगतका घटनाक्रम स्मरण गराउँदै रास्वपाकै सांसदहरूले यसअघि सभामुखको आसनअगाडि निलो स्कार्फ लगाएर विरोध प्रदर्शन गर्दै सदन बहिष्कार गरेको प्रसंग पनि उठाए । उनले भने, “अस्ति भरखरका घटनाक्रम हामीले बिर्सेका छैनौँ । सभामुखको वेल अगाडि निलो स्कार्फ लगाएर विरोध गरिरहेको र सदन छाडेर हिँडेको हामीले पनि देखेका थियौँ । त्यो पनि तमासा देखाएकै थियो ?”
प्रतिक्रिया