काठमाडौँ । सीमाविद् र विज्ञहरूले प्रधानमन्त्री बालेन्द्र शाहले प्रतिनिधि सभामा दिएको एक अभिव्यक्तिलाई लिएर गम्भीर आपत्ति प्रकट गरेका छन् ।
आज एक विज्ञप्ति जारी गर्दै उनीहरुले ‘नेपालले पनि भारतको सीमा मिचेको छ’ भनी प्रधानमन्त्रीले सदनमा व्यक्त गरेको धारणाप्रति गम्भीर आपत्ति प्रकट गरेका हुन् ।
सीमाविद् बुद्धिनारायण श्रेष्ठ, प्राडा. पीताम्बर शर्मा, प्राडा. नरेन्द्र खनाल, डा. जगत भुसाल, अन्तर्राष्ट्रिय सीमाविद् प्रभाकर शर्मा र डा. द्वारिकानाथ ढुङ्गेलले प्रधानमन्त्रीको भनाइप्रति आश्चर्य व्यक्त गर्दै धानमन्त्रीको यस्तो अभिव्यक्तिले राष्ट्रियता र सीमाको संवेदनशील विषयमा अनावश्यक भ्रम सिर्जना गरेको विज्ञहरू निष्कर्ष निकालेका छन् ।
प्रतिनिधि सभाको प्रश्नोत्तर कार्यक्रममा आइतबार अकस्मात सहभागी भएका प्रधानमन्त्री बालेन्द्र शाहले नेपालले पनि भारतको सीमा मिचेको दाबी गरेका थिए । प्रविज्ञहरूले प्रधानमन्त्रीको उक्त भनाइलाई आधारहीन र प्रमाणविहीन भनेका छन् ।
‘आजसम्म नेपालले भारतको सीमा मिचेको कुरा कुनै पनि आधिकारिक निकायबाट सुनिएको थिएन । नेपाल–भारत संयुक्त सीमा आयोगले ९८ प्रतिशत काम सम्पन्न गरिसक्दा पनि कतैबाट नेपालले अतिक्रमण गरेको निष्कर्ष निस्किएको छैन ।’ विज्ञप्तिमा भनिएको छ ।
विज्ञहरूले महाकाली नदीको मुहान र सुस्ता क्षेत्रको विवाद समाधान हुन बाँकी रहेको तथ्यलाई स्मरण गराउँदै राष्ट्रको सार्वभौमिकता र भौगोलिक अखण्डता जस्तो संवेदनशील विषयमा कार्यकारी प्रमुखबाटै तथ्यहीन अभिव्यक्ति आउनु दुर्भाग्यपूर्ण भएको बताएका छन् ।
नेपालले आफ्नो अद्यावधिक राजनीतिक तथा प्रशासनिक नक्सा जारी गरिसकेको स्मरण गराउँदै विज्ञहरूले प्रधानमन्त्रीसँग प्रश्न गरेका छन्, ‘यो अभिव्यक्ति दिनुको आधार वा प्रमाण के हो ?’
प्रधानमन्त्रीको अभिव्यक्तिका कारण आम नागरिकमा भ्रम सिर्जना भएको भन्दै सीमाबिद र विज्ञहरूले तीन बुँदे माग अघि सारेका छन् । उनीहरुले प्रधानमन्त्रीले आफ्नो अभिव्यक्तिबारे तत्काल सार्वजनिक रूपमा स्पष्टीकरण दिनुपर्ने, भ्रम सिर्जना गर्ने खालको सो अभिव्यक्तिप्रति प्रधानमन्त्रीले क्षमायाचना गर्नुपर्ने तथा प्रतिनिधि सभामा दिइएको उक्त गलत अभिव्यक्तिलाई संसदीय रेकर्डबाट हटाउन सभामुख समक्ष माग गरेका छन् ।
प्रतिक्रिया