काठमाडौं । तत्कालीन गृहमन्त्री सुधन गुरुङमाथि छानबिन गर्न गठित समितिले आफ्नो प्रतिवेदन प्रधानमन्त्री वालेन्द्र शाहलाई बुझाएको छ । जेठ १८ गते नै कार्यकाल सकिएको समितिले पाँच दिनको थप समय लिएर शुक्रबार प्रतिवेदन बुझाएको हो ।
स्रोतका अनुसार समितिले गुरुङलाई क्लिन चिट दिने निष्कर्षसहित प्रतिवेदन पेश गरेको छ । अकुत सम्पत्ति आर्जन गरेको, सम्पत्तिको स्रोत नखुलाएको तथा विवादित व्यवसायी दीपक भट्टसँग साझेदारीमा लगानी गरेको विषय सार्वजनिक भएपछि गुरुङले वैशाख ९ गते गृहमन्त्री पदबाट राजीनामा दिएका थिए ।
उनीमाथि छानबिन गर्न सरकारले वैशाख २८ गते उच्च अदालतका पूर्वन्यायाधीश अच्युतप्रसाद भण्डारीको अध्यक्षतामा तीन सदस्यीय समिति गठन गरेको थियो । समितिमा महालेखा नियन्त्रक शोभाकान्त पौडेल र महान्यायाधिवक्ता कार्यालयका सहन्यायाधिवक्ता अच्युतमणि न्यौपाने सदस्य थिए ।
उक्त समितिले अध्ययन तथा अनुसन्धानपछि शुक्रबार प्रधानमन्त्री शाहसमक्ष प्रतिवेदन बुझाएको हो । गुरुङको राजीनामापछि रिक्त रहेको गृह मन्त्रालय हाल प्रधानमन्त्री वालेन्द्र शाह आफैंले सम्हालिरहेका छन् । स्रोतका अनुसार छानबिन प्रतिवेदनको निष्कर्षका आधारमा प्रधानमन्त्री शाहले गुरुङलाई पुनः गृह मन्त्रालयको जिम्मेवारी दिने तयारी गरेका छन् ।
प्रतिक्रिया