काठमाडौं । नेपाल एसियन गेम्स पुरुष क्रिकेट छनोट प्रतियोगिताको फाइनलमा प्रवेश गरेको छ । सिंगापुरस्थित नेसनल क्रिकेट मैदानमा शुक्रबार भएको पहिलो सेमिफाइनलमा ओमानलाई ८ विकेटले पराजित गर्दै नेपाल उपाधिनजिक पुगेको हो ।
ओमानले दिएको ९५ रनको सामान्य लक्ष्य नेपालले ९.२ ओभरमा मात्र दुई विकेट गुमाएर पूरा गर्यो । जितका लागि ६४ बल बाँकी रहँदै लक्ष्य भेट्टाएको नेपालका लागि लोकेश बमले अविजित ४४ रनको उत्कृष्ट इनिङ खेले । उनले २६ बलमा ७ चौका र एक छक्का प्रहार गरे ।
रोहित पौडेल २१ रनमा अविजित रहे भने कुशल भुर्तेलले २० रनको योगदान दिए । आशिफ शेख भने १ रनमै आउट भएका थिए ।
यसअघि टस जितेर पहिले ब्याटिङ गरेको ओमानलाई नेपालले १९.४ ओभरमा ९४ रनमा समेटेको थियो। नेपाली बलरहरूले सुरुदेखि नै ओमानमाथि दबाब कायम राखेका थिए ।
नेपालका लागि करण केसीले ४ ओभरमा एक मेडनसहित २० रन खर्चेर ३ विकेट लिए। सन्दीप लामिछानेले १९ रन खर्चेर २ विकेट हात पारे भने सोमपाल कामीले एक मेडनसहित २६ रन दिएर २ विकेट लिए । साहब आलम, कुशल मल्ल र कप्तान दीपेन्द्रसिंह ऐरीले समान एक-एक विकेट लिए ।
ओमानका कप्तान सुफयान महमूदले सर्वाधिक ३८ रन बनाए । जुबैर अल बालुशीले २२ तथा अब्दुल जलीलले १६ रन जोडे । अन्य कुनै पनि ब्याट्सम्यानले दोहोरो अंकमा रन बनाउन सकेनन् ।
समूह ‘ए’ को विजेता बनेर सेमिफाइनल पुगेको नेपालले समूह ‘बी’ को उपविजेता ओमानलाई पराजित गर्दै फाइनल यात्रा तय गरेको हो । नेपालले यसअघि समूह चरणमा चीनलाई २२१ रन र मलेसियालाई १६७ रनको विशाल अन्तरले हराएको थियो ।
नेपालले अब फाइनलमा समूह ‘बी’ को विजेता हङकङ र समूह ‘ए’ को उपविजेता मलेसियाबीच हुने दोस्रो सेमिफाइनलको विजेतासँग प्रतिस्पर्धा गर्नेछ । प्रतियोगिताको फाइनल खेल सोमबार सिंगापुरमा हुनेछ ।
यसअघि नै नेपाल, मलेसिया, ओमान र हङकङ एसियन गेम्सका लागि छनोट भइसकेका छन् । सेमिफाइनलमा पुगेका चारै टोलीले एसियन गेम्सको टिकट सुरक्षित गरेका हुन् ।
प्रतिक्रिया