सत्तारुढ दल रास्वपाको आह्वानमा आज सर्वदलीय बैठक बस्दै

काठमाडौं । राष्ट्रिय स्वतन्त्र पार्टी (रास्वपा) को आह्वानमा आज सर्वदलीय बैठक बस्दैछ । बैठक बिहान ९ बजे सिंहदरबारस्थित सार्वजनिक लेखा समितिको हलमा आयोजना गरिएको रास्वपाले जनाएको छ ।

रास्वपाका महामन्त्री कविन्द्र बुर्लाकोटीका अनुसार बैठकमा संघीय संसद्को प्रतिनिधिसभा र राष्ट्रियसभामा प्रतिनिधित्व गर्ने राजनीतिक दलका अध्यक्ष वा सभापतिसहित दुई-दुई जना प्रतिनिधिलाई आमन्त्रण गरिएको छ ।

सर्वदलीय बैठकको औपचारिक निमन्त्रणा तथा अनुरोधपत्र संसद्मा प्रतिनिधित्व गर्ने सबै राजनीतिक दललाई पठाइसकिएको रास्वपाले जनाएको छ ।

बैठकमा रास्वपा सभापति रवि लामिछानेले हालै सम्पन्न आफ्नो तथा परराष्ट्रमन्त्री शिशिर खनालको भारत भ्रमणबारे जानकारी गराउने कार्यक्रम रहेको छ । भ्रमणका क्रममा भएका उच्चस्तरीय भेटवार्ता तथा प्राप्त उपलब्धिबारे राजनीतिक दलहरूलाई अवगत गराइने बताइएको छ ।

यसका साथै संसद्मा जारी गतिरोध, समसामयिक राजनीतिक अवस्था तथा राष्ट्रिय महत्वका विषयमा पनि बैठकमा छलफल हुने जनाइएको छ ।

रास्वपाले राष्ट्रिय हितसँग सम्बन्धित विषयमा राजनीतिक दलहरूबीच साझा धारणा निर्माण गर्न तथा संवादको वातावरण सुदृढ बनाउन सर्वदलीय बैठक आयोजना गरिएको जनाएको छ ।