काठमाडौं । नेपालले सिंगापुरमा जारी एघारौं संस्करणको ‘मेन्स टी-२० आई एसियन गेम्स क्वालिफायर’ क्रिकेट प्रतियोगिताको उपाधि जितेको छ । सोमबार नेसनल क्रिकेट ग्राउन्डमा भएको फाइनल खेलमा हङकङलाई डीएलएस पद्धतिअनुसार १९ रनले पराजित गर्दै नेपाल च्याम्पियन बनेको हो ।
हङकङले दिएको १८९ रनको विशाल लक्ष्य पछ्याइरहेको नेपाल ११.३ ओभरमा २ विकेट गुमाएर १०५ रन बनाएको अवस्थामा वर्षाका कारण खेल रोकिएको थियो । त्यसपछि खेल पुनः सञ्चालन हुन नसकेपछि डीएलएस पद्धतिअनुसार नेपाल विजयी घोषित भएको हो ।
नेपालको जितमा ओपनर कुशल भुर्तेलले उत्कृष्ट प्रदर्शन गरे । उनले ४० बलमा ८ चौका र ३ छक्काको मद्दतमा ६५ रनको आक्रामक इनिङ्स खेले । अर्का ओपनर आसिफ शेख सस्तैमा आउट भए पनि कप्तान रोहित पौडेल २४ बलमा ३५ रन र दीपेन्द्रसिंह ऐरी ४ बलमा ९ रन बनाएर क्रिजमा अविजित थिए ।
हङकङका लागि आयुष शुक्लाले ३ ओभरमा २० रन खर्चेर १ विकेट लिए भने एहसान खानले २ ओभरमा २४ रन खर्चेर १ विकेट हात पारे ।
त्यसअघि टस हारेर पहिले ब्याटिङ गरेको हङकङले निर्धारित २० ओभरमा ७ विकेट गुमाउँदै १८८ रनको प्रतिस्पर्धात्मक योगफल तयार गरेको थियो ।
हङकङका लागि अंशुमन रथले उत्कृष्ट ब्याटिङ गर्दै ४५ बलमा ६ चौका र ६ छक्कासहित सर्वाधिक ८० रन बनाए । विकेटकिपर ब्याटर शाहिद वासिफले २८ बलमा ५५ रन जोडे भने शिव माथुरले २६ रनको योगदान दिए ।
नेपालका लागि बलिङतर्फ शेर मल्ल सर्वाधिक सफल रहे । उनले ४ ओभरमा ३२ रन खर्चेर ४ विकेट लिए । करण केसीले ४ ओभरमा ४५ रन दिएर २ विकेट लिए भने सन्दीप लामिछानेले १ विकेट हात पारे ।
उपाधिसँगै नेपालले प्रतियोगितामा अपराजित यात्रा कायम राख्दै एसियन गेम्स छनोटको उत्कृष्ट समापन गरेको छ ।
प्रतिक्रिया