काठमाडौं । प्रतिनिधिसभाको बैठकमा आज पनि विपक्षी दलहरूले अवरोध जारी राखेका छन्। बैठक सुरु हुनासाथ विपक्षी सांसदहरू आ-आफ्नो स्थानबाट उठेर विरोध जनाएका थिए।
सभामुख डीपी अर्यालले बैठक प्रारम्भ गरेलगत्तै विपक्षी सांसदहरूले विरोध प्रदर्शन गरेपछि सभामुखले एमाले सांसद क्षितिज थेबेलाई बोल्ने समय दिएका थिए। त्यसक्रममा सांसद थेबेले प्रधानमन्त्री वालेन्द्र शाह (बालेन)ले संसदमा दिएको अभिव्यक्तिबारे स्पष्ट जवाफ नदिएसम्म विपक्षी दलहरूले संसद अवरोधलाई निरन्तरता दिने चेतावनी दिए।
यस्तै, नेपाली कम्युनिष्ट पार्टीका सांसद महेन्द्रबहादुर शाहीले संसद सञ्चालनका लागि सभामुखको भूमिका निष्पक्ष हुनुपर्ने बताएका छन्। उनले प्रधानमन्त्री स्वयं सदनमा उपस्थित भएर विवादित अभिव्यक्तिका विषयमा माफी नमागेसम्म संसदको कारबाही अगाडि बढाउन नहुने धारणा राखे।
नेपाली कांग्रेका निष्कल राईले मेयर हुँदा ग्रेटर नेपालको नक्शा राखेका प्रधानमन्त्रीले राष्ट्रहित विपरित कसरी बोल्न सकेको भन्दै प्रश्न गरे ।
प्रधानमन्त्री बालेनले यसअघि प्रतिनिधिसभामा सम्बोधन गर्ने क्रममा भूमिकासम्बन्धी विषयमा दिएको अभिव्यक्ति विवादमा परेको थियो। सो अभिव्यक्तिबारे प्रधानमन्त्रीले संसदमा आएर स्पष्टीकरण दिनुपर्ने र जवाफ नआएसम्म सदन सञ्चालन हुन नदिने अडान विपक्षी दलहरूले कायम राखेका छन्।
विपक्षीको निरन्तर अवरोधका कारण प्रतिनिधिसभाको बैठक प्रभावित बनेको छ।
प्रतिक्रिया