काठमाडौं । फिफा विश्वकप फुटबलअन्तर्गत सहआयोजक मेक्सिको नकआउट चरण (राउण्ड अफ ३२) मा प्रवेश गरेको छ । शुक्रबार राति ग्वाडालाजारामा सम्पन्न समूह ‘ए’ को खेलमा दक्षिण कोरियालाई १-० ले पराजित गर्दै मेक्सिकोले अन्तिम ३२ मा स्थान सुरक्षित गरेको हो ।
मेक्सिकोको जितमा लुइस रोमोले निर्णायक गोल गरे । उनले खेलको ५० औँ मिनेटमा गरेको गोल नै टोलीको जितका लागि पर्याप्त बन्यो ।
घरेलु समर्थकमाझ उत्कृष्ट प्रदर्शन गरेको मेक्सिकोले लगातार दोस्रो जित निकाल्दै दुई खेलबाट ६ अंक जोडेको छ । यससँगै मेक्सिको समूह चरणको एक खेल बाँकी रहँदै नकआउट चरणमा पुग्ने पहिलो टोलीमध्ये एक बनेको छ ।
पराजित दक्षिण कोरियाको भने दुई खेलबाट ३ अंक रहेको छ। अब उसको नकआउट यात्राको सम्भावना अन्तिम खेलको नतिजामा निर्भर रहनेछ ।
यसअघि पहिलो खेलमा मेक्सिकोले दक्षिण अफ्रिकालाई पराजित गरेको थियो भने दक्षिण कोरियाले चेक रिपब्लिकमाथि जित हासिल गरेको थियो ।
सन् २०१८ को विश्वकपमा अन्तिम १६ सम्म पुगेको मेक्सिको सन् २०२२ को संस्करणमा भने समूह चरणबाटै बाहिरिएको थियो । यसपटक घरेलु मैदानमा खेलिरहेको मेक्सिकोले पुनः नकआउट चरणमा स्थान बनाउँदै उपाधि यात्रालाई बलियो बनाएको छ ।
यस विश्वकपमा प्रत्येक समूहबाट शीर्ष दुई टोली तथा तेस्रो स्थानमा रहने उत्कृष्ट आठ टोली गरी कुल ३२ टोली नकआउट चरणमा प्रवेश गर्ने प्रावधान रहेको छ ।
प्रतिक्रिया