काठमाडौं । कप्तान लियोनल मेस्सीको कीर्तिमानी प्रदर्शनमा अर्जेन्टिनाले फिफा विश्वकप २०२६ अन्तर्गत अष्ट्रियामाथि २-० को महत्वपूर्ण जित हासिल गरेको छ ।
खेलमा अर्जेन्टिनाका दुवै गोल मेस्सीले गरे । उनले ३८ औँ मिनेटमा गोल गर्दै टोलीलाई अग्रता दिलाएका थिए भने इन्जुरी समयमा अर्को गोल थप्दै अर्जेन्टिनाको जित सुनिश्चित गरे ।
यससँगै मेस्सीले विश्वकप इतिहासमा सर्वाधिक गोल गर्ने खेलाडीको कीर्तिमान आफ्नो नाममा लेखाएका छन् । अष्ट्रियाविरुद्धका दुई गोलसँगै उनको विश्वकप गोल संख्या १८ पुगेको छ। यसअघि जर्मनीका मिरोस्लाभ क्लोजेको नाममा रहेको १६ गोलको कीर्तिमान उनले तोडेका हुन् ।
मेस्सीले यसअघि अल्जेरियाविरुद्ध ह्याट्रिक गर्दै क्लोजेको कीर्तिमान बराबरी गरेका थिए । अष्ट्रियाविरुद्ध थप दुई गोल गरेपछि उनी विश्वकप इतिहासकै सर्वाधिक गोलकर्ता बनेका छन् ।
खेलको चौथो मिनेटमै अर्जेन्टिनाले पेनाल्टीको अवसर पाएको थियो । तर मेस्सी पेनाल्टीमा गोल गर्न असफल भए । त्यसपछि उनले उत्कृष्ट पुनरागमन गर्दै दुई गोल गरे र टोलीको जितमा निर्णायक भूमिका निर्वाह गरे ।
लगातार दोस्रो जितसँगै अर्जेन्टिनाले समूह चरणमा ६ अंक जोडेको छ । यससँगै टोलीले नकआउट चरणमा स्थान सुरक्षित गरेको छ । यसअघि अर्जेन्टिनाले आफ्नो पहिलो खेलमा अल्जेरियालाई ३-० ले पराजित गरेको थियो ।
प्रतिक्रिया