काठमाडौं । खराब मौसमका कारण साढे दुई घण्टासम्म अवरुद्ध भएको खेलमा इराकलाई ३-० ले पराजित गर्दै फ्रान्स फिफा विश्वकप २०२६ को नकआउट चरणमा प्रवेश गरेको छ । लगातार दोस्रो जित दर्ता गरेको फ्रान्सले समूह चरणबाटै अन्तिम ३२ मा स्थान सुरक्षित गरेको हो ।
फ्रान्सको जितमा कप्तान केलियन एमबाप्पेले दुई गोल गरे भने ओसमान डेम्बेलेले एक गोल थपे । खेलको १४ औँ मिनेटमा एमबाप्पेले गोल गर्दै फ्रान्सलाई अग्रता दिलाएका थिए। आफ्नो राष्ट्रिय टोलीका लागि १०० औँ खेल खेलिरहेका एमबाप्पेका लागि यो गोल विशेष रह्यो ।
पहिलो हाफ समाप्त भएपछि खराब मौसमका कारण खेल करिब दुई घण्टासम्म स्थगित गरिएको थियो। मौसममा सुधार आएपछि दोस्रो हाफ पुनः सुरु भएको थियो ।
खेल पुनः सुरु भएपछि पनि फ्रान्सले आफ्नो दबाब कायम राख्यो । ५४ औँ मिनेटमा एमबाप्पेले व्यक्तिगत दोस्रो गोल गर्दै टोलीको अग्रता दोब्बर बनाए । त्यसपछि ६६ औँ मिनेटमा ओसमान डेम्बेलेले गोल गर्दै फ्रान्सको जित सुनिश्चित गरे । डेम्बेलेको कुनै पनि ठूलो अन्तर्राष्ट्रिय प्रतियोगितामा यो पहिलो गोल हो ।
यसअघि आफ्नो पहिलो खेलमा फ्रान्सले सेनेगललाई पराजित गरेको थियो । लगातार दुई जितसँगै फ्रान्सले नकआउट चरणमा स्थान सुरक्षित गर्दा इराक भने लगातार दोस्रो हारसँगै समूह चरणबाटै बाहिरिएको छ ।
प्रतिक्रिया