काठमाडौं । फिफा विश्वकप २०२६ अन्तर्गत समूह ‘आई’ को खेलमा सेनेगललाई ३-२ गोलले पराजित गर्दै नर्वे नकआउट चरणमा प्रवेश गरेको छ ।
न्युजर्सीस्थित रंगशालामा आज बिहान सम्पन्न खेलमा नर्वेको जितमा मार्कस पेडरसनले एक तथा एर्लिङ हालान्डले दुई गोल गरे । सेनेगलका इस्माइला सारले दुई गोल फर्काए पनि टोलीलाई हारबाट जोगाउन सकेनन् ।
खेलको ४३ औँ मिनेटमा पेडरसनले गोल गर्दै नर्वेलाई अग्रता दिलाएका थिए । पहिलो हाफमा १-० को अग्रता बनाएको नर्वेले दोस्रो हाफको सुरुमै खेलमा पकड बनायो । ४८ औँ मिनेटमा हालान्डले गोल गर्दै अग्रता दोब्बर बनाए ।
तर सेनेगलले ५३ औँ मिनेटमा इस्माइला सारको गोलमार्फत खेलमा फर्कने संकेत देखायो । त्यसको पाँच मिनेटपछि हालान्डले व्यक्तिगत दोस्रो गोल गर्दै नर्वेलाई ३-१ को मजबुत अग्रता दिलाए ।
खेलको इन्जुरी समयमा सारले व्यक्तिगत दोस्रो गोल गरे पनि त्यसपछि थप गोल हुन नसक्दा सेनेगल ३-२ ले पराजित भयो ।
लगातार दोस्रो जित निकालेको नर्वे ६ अंकसहित समूह ‘आई’ को शीर्ष स्थानमा रहँदै नकआउट चरणमा प्रवेश गरेको छ । यता लगातार दोस्रो हार बेहोरेको सेनेगल भने समूह चरणबाटै बाहिरिएको छ ।
प्रतिक्रिया