काठमाडौं । फिफा विश्वकप २०२६ अन्तर्गत समूह ‘के’ को खेलमा कोलम्बियाले डेमोक्रेटिक रिपब्लिक अफ कंगो (डीआर कंगो) लाई १-० गोल अन्तरले पराजित गर्दै नकआउट चरणमा स्थान सुरक्षित गरेको छ ।
बुधबार बिहान सम्पन्न प्रतिस्पर्धात्मक खेलमा कोलम्बियालाई जित दिलाउन ड्यानियल मुनोजले गरेको एकमात्र गोल निर्णायक बन्यो । पहिलो हाफ गोलरहित बराबरीमा सकिएको खेलको ७६ औँ मिनेटमा मुनोजले गोल गर्दै टोलीलाई अग्रता दिलाएका थिए ।
खेलको अन्तिम समयमा डीआर कंगोले बराबरी गोलका लागि दबाब बढाए पनि कोलम्बियाको सुदृढ रक्षापङ्क्ति पार गर्न सकेन । यता, खेलको अन्त्यतिर कोलम्बियाले थप दुई गोल गरे पनि दुवै अफसाइडका कारण मान्यता पाएनन् ।
यो जितसँगै लगातार दोस्रो सफलता हासिल गरेको कोलम्बियाले दुई खेलबाट ६ अंक जोड्दै एक खेल बाँकी रहँदै समूहबाट नकआउट चरणमा प्रवेश गरेको छ ।
यसअघि पहिलो खेलमा कोलम्बियाले उज्बेकिस्तानलाई ३-१ गोल अन्तरले पराजित गरेको थियो । समूह ‘के’ मा पोर्चुगलको ४ अंक, डीआर कंगोको १ अंक रहेको छ भने उज्बेकिस्तान अझै अंकविहीन छ ।
प्रतिक्रिया