काठमाडौं । ट्युनिसियामाथि ३-१ को सहज जित निकाल्दै नेदरल्याण्ड्स विश्वकप फुटबलको समूह एफको विजेताका रूपमा नकआउट चरणमा प्रवेश गरेको छ ।
खेलको तेस्रो मिनेटमै ट्युनिसियाका एलिस स्किरीबाट आत्मघाती गोल भएपछि नेदरल्याण्ड्सले अग्रता लिएको थियो । त्यसको चार मिनेटपछि ब्रायन बबीले गोल थप्दै टोलीलाई २-० को बलियो अवस्थामा पुर्याए ।
ट्युनिसियाका हाजेम मस्त्यौरीले एक गोल फर्काउँदै अन्तर घटाए पनि ६३ औँ मिनेटमा जोन पाउल भानले गोल गर्दै नेदरल्याण्ड्सको जित सुनिश्चित गरे ।
यसअघि नेदरल्याण्ड्सले जापानसँग १-१ को बराबरी खेलेको थियो भने स्वीडेनलाई ५-१ ले पराजित गरेको थियो । ट्युनिसियामाथिको जितसँगै नेदरल्याण्ड्सले तीन खेलबाट सात अंक जोड्दै समूहको शीर्ष स्थान सुरक्षित गरेको हो ।
समूहको अर्को खेलमा जापान र स्वीडेनले १-१ को बराबरी खेले । जापानका लागि डेजिन मेदाले ५५ औँ मिनेटमा गोल गरेका थिए भने स्वीडेनका एन्थोनी एलेग्नाले ६१ औँ मिनेटमा बराबरी गोल फर्काए ।
जापानले यसअघि ट्युनिसियालाई ४-० ले पराजित गर्नुका साथै नेदरल्याण्ड्ससँग बराबरी खेलेको थियो । स्वीडेनले ट्युनिसियामाथि ५-१ को जित निकाले पनि नेदरल्याण्ड्ससँग समान अन्तरले पराजित भएको थियो ।
समूह चरणको समाप्तिसँगै सात अंकसहित नेदरल्याण्ड्स शीर्ष स्थानमा रहँदा पाँच अंक जोडेको जापान दोस्रो स्थानमा रह्यो । चार अंक रहेको स्वीडेन तेस्रो स्थानमा सीमित भयो भने तीनै खेलमा पराजित ट्युनिसिया अंकविहीन रहँदै प्रतियोगिताबाट बाहिरिएको छ ।
प्रतिक्रिया