चलचित्र ‘पार्वती’को रत्यौली गीत ‘नौतुना रेलैमा’ सार्वजनि
काठमाडौं । आगामी भदौ १२ गतेदेखि प्रदर्शनमा आउन लागेको नेपाली चलचित्र ‘पार्वती’ को पहिलो रत्यौली गीत ‘नौतुना रेलैमा’ सार्वजनिक गरिएको छ । निर्माण टिमले शुक्रबार ओएसआर युट्युब च्यानलमार्फत गीत सार्वजनिक गरेको हो ।
सार्वजनिक गीतको भिडियोमा चलचित्रका मुख्य कलाकार नीता ढुङ्गाना, दीपाश्री निरौला, अञ्जली अधिकारी, सिरु विष्ट, बसुन्धरा भुसाल, आशा पौडेल, अशोक दर्जी र क्रिमसन श्रेष्ठ को नृत्य देख्न सकिन्छ । विवाह समारोहमा महिलाले खेल्ने रत्यौलीलाई केन्द्रमा राखेर तयार गरिएको भिडियोमा दीपाश्री पुरुषको भेषभूषामा तथा नीता ढुङ्गाना महिलाकै परम्परागत पहिरनमा देखिएकी छन् ।
गीतमा रचना रिमाल, सरु गौतम र सहिमा श्रेष्ठको स्वर, हर्क साउदको शब्द तथा दीपक शर्माको संगीत रहेको छ । संगीत संयोजन, मिक्सिङ र मास्टरिङ नरेन्द्र वियोगीले गरेका हुन् भने कोरियोग्राफी रामजी लामिछानेले गरेका छन् ।
अभिनेत्री नीता ढुङ्गाना कै कथा तथा निर्देशनमा बनेको फिल्ममा उनी स्वयं मुख्य भूमिकामा छिन् । फिल्ममा दीपाश्री निरौला, अशोक दर्जी, सिरु विष्ट, राधिका कँडेल, राज पंगेनी शर्मा, राजेन्द्र नेपाली र आशा पौडेल लगायतका कलाकारको अभिनय रहेको छ ।
फिल्मको पटकथा पनि नीता ढुङ्गानाकै रहेको छ भने स्क्रिप्ट शिवम् अधिकारीले लेखेका हुन् । सुदीप बराल डीओपी रहेको फिल्मका कार्यकारी निर्माता तथा प्रोडक्सन म्यानेजर शंकर पाण्डे हुन् भने निर्माता हरिहर अधिकारी रहेका छन् । फिल्मको सम्पादन तथा टिजर–ट्रेलर साहिल खानले तयार पार्नेछन् । रोयल भीमसेन ले पोस्टर डिजाइन गरेको फिल्मको वितरण एफडी कम्पनी, एप्पल इन्टरटेनमेन्ट र रिच इन्टरटेनमेन्टले गर्नेछन् भने डिजिटल अधिकार ओएसआरले खरिद गरेको छ ।
प्रतिक्रिया