संसद्मा उठेका प्रश्नको जवाफ दिन सरकारलाई सभामुखको निर्देशन

काठमाडौं । सभामुख डोलप्रसाद अर्यालले प्रतिनिधिसभामा सांसदहरूले उठाएका समसामयिक तथा जनचासोका विषयमा स्पष्ट जवाफ दिन नेपाल सरकारलाई निर्देशन दिएका छन्।

विशेषगरी कर्णाली राजमार्गमा भएको हालैको सवारी दुर्घटना, मनसुनजन्य विपद्को पूर्वतयारी तथा बाढी, पहिरो र डुबानबाट हुन सक्ने क्षति न्यूनीकरणका विषयमा सरकारलाई संसद्मै जानकारी गराउन उनले रुलिङ गरेका हुन्।

सोमबार बसेको प्रतिनिधिसभा बैठकमा आकस्मिक र शून्य समयमा सांसदहरूले विभिन्न सार्वजनिक सरोकारका विषयमा सरकारको ध्यानाकर्षण गराएपछि सभामुख अर्यालले सम्बन्धित विषयमा सरकारको आधिकारिक धारणा प्रस्तुत गर्न निर्देशन दिएका हुन्।

सभामुख अर्यालले सांसदहरूले उठाएका विषयहरू गम्भीर र महत्वपूर्ण रहेको उल्लेख गर्दै देशका विभिन्न भागमा मनसुनका कारण हुन सक्ने बाढी, पहिरो र डुबानबाट जनधनको क्षति रोक्न तथा न्यूनीकरण गर्न सरकारले गरेका पूर्वतयारी र विपद् व्यवस्थापनसम्बन्धी कामकारबाहीबारे संसद्लाई जानकारी गराउन निर्देशन दिए।

उनले बाढी, पहिरो र डुबानको सम्भावित जोखिमलाई ध्यानमा राख्दै प्रभावकारी विपद् व्यवस्थापनका लागि आवश्यक तयारीबारे पनि सरकार स्पष्ट हुनुपर्ने बताएका छन्।

बैठकमा सांसदहरूले विशेषगरी कर्णाली राजमार्गमा हालै भएको सवारी दुर्घटनालाई लिएर सरकारको उद्धार तथा राहत व्यवस्थाप्रति प्रश्न उठाएका थिए। सरकार समयमै प्रभावकारी रूपमा उद्धारमा परिचालित हुन नसकेको भन्दै सत्तापक्ष र प्रतिपक्ष दुवैतर्फका सांसदहरूले गृहमन्त्रीबाट संसद्मै जवाफ माग गरेका थिए।

सत्तापक्ष र प्रतिपक्ष दुवै पक्षबाट एउटै विषयमा सरकारको जवाफ माग भएपछि सभामुख अर्यालले सम्बन्धित विषयमा सरकारलाई संसद्मा उपस्थित भएर आवश्यक जानकारी र जवाफ दिन औपचारिक निर्देशन दिएका हुन्।