काठमाडौं । आयोजक राष्ट्र अमेरिकालाई ४-१ गोलअन्तरले पराजित गर्दै बेल्जियम फिफा विश्वकप २०२६ को क्वाटरफाइनलमा प्रवेश गरेको छ । प्रभावशाली प्रदर्शन गरेको बेल्जियमले खेलभरि नै आफ्नो वर्चस्व कायम राख्दै अन्तिम आठमा स्थान सुरक्षित गरेको हो ।
बेल्जियमको जितमा चार्ल्स डी केटेलाएर नायक बने । उनले व्यक्तिगत दुई गोल गर्दै टोलीको जितमा महत्वपूर्ण योगदान दिए ।
खेलको नवौँ मिनेटमै डी केटेलाएरले गोल गर्दै बेल्जियमलाई अग्रता दिलाएका थिए । तर आयोजक अमेरिकाले ३१ औँ मिनेटमा मलिक टिलिमेनको गोलमार्फत खेललाई १-१ को बराबरीमा ल्याउँदै पुनरागमनको संकेत दिएको थियो ।
तर त्यो बराबरी लामो समय टिक्न सकेन । ३३ औँ मिनेटमा डी केटेलाएरले व्यक्तिगत दोस्रो गोल गर्दै बेल्जियमलाई पुनः २-१ को अग्रता दिलाए र पहिलो हाफ बेल्जियमको पक्षमा सकियो ।
दोस्रो हाफमा पनि बेल्जियमले आफ्नो लय कायम राख्यो । ५७ औँ मिनेटमा हान्स भानाकेनले गोल गर्दै टोलीको अग्रता ३-१ पुर्याए । त्यसपछि इन्जुरी समयको अन्तिमतिर अनुभवी स्ट्राइकर रोमेलु लुकाकुले अर्को गोल थपेपछि बेल्जियमले ४-१ को शानदार जित दर्ता गर्यो ।
यस हारसँगै अमेरिका विश्वकपबाट बाहिरिएको छ । यसअघि सह-आयोजक क्यानडा र मेक्सिको पनि प्रतियोगिताबाट बाहिरिसकेका थिए । यससँगै फिफा विश्वकप २०२६ का तीनवटै आयोजक राष्ट्रको यात्रा नकआउट चरणमै समाप्त भएको छ ।
अब बेल्जियमले क्वाटरफाइनलमा स्पेनसँग प्रतिस्पर्धा गर्नेछ । स्पेनले अन्तिम १६ मा पोर्चुगललाई पराजित गर्दै अन्तिम आठमा स्थान बनाएको थियो । युरोपका दुई बलिया टोलीबीच हुने यो भिडन्त विश्वकपको सबैभन्दा प्रतिक्षित क्वाटरफाइनल खेलमध्ये एक मानिएको छ ।
प्रतिक्रिया