काठमाडौं । ओपनर कुशल भुर्तेलको शतकीय इनिङ्स र हेमन्त धामीको उत्कृष्ट बलिङको मद्दतमा नेपालले जर्सीविरुद्धको पहिलो एकदिवसीय क्रिकेट खेलमा ८१ रनको प्रभावशाली जित हासिल गरेको छ ।
जर्सी भ्रमणमा रहेको नेपाली टोलीले दिएको २५१ रनको लक्ष्य पछ्याएको घरेलु टोली जर्सी ४१ ओभरमै १६९ रनमा अलआउट भयो । जर्सीका चार्ली ब्रेननले ८२ रनको संघर्षपूर्ण इनिङ्स खेले पनि टोलीलाई हारबाट जोगाउन सकेनन् । अन्य ब्याट्सम्यानले अपेक्षित प्रदर्शन गर्न नसक्दा जर्सी ठूलो अन्तरले पराजित हुन पुग्यो ।
नेपालका लागि हेमन्त धामीले घातक बलिङ गर्दै ४ विकेट लिए । आरिफ शेखले ३ विकेट हात पार्दा करण केसीले २ तथा सन्दीप लामिछानेले १ विकेट लिए ।
यसअघि टस हारेर पहिले ब्याटिङ गरेको नेपालले निर्धारित ५० ओभरमा ८ विकेट गुमाउँदै २५० रन बनाएको थियो । नेपालको इनिङ्समा ओपनर कुशल भुर्तेलले १०५ रनको शानदार शतकीय पारी खेले । भीम सार्कीले ३९ रन योगदान गर्दा हेमन्त धामीले अविजित १९ रन जोडे ।
त्यस्तै आसिफ शेखले १६, कप्तान रोहित पौडेलले १५, आरिफ शेखले ११ तथा ईशान पाण्डेले १ रन बनाए ।
जितसँगै नेपालले दुई खेलको एकदिवसीय शृंखलामा १-० को अग्रता बनाएको छ । नेपाल र जर्सीबीचको दोस्रो तथा अन्तिम एकदिवसीय खेल बुधबार हुनेछ ।
प्रतिक्रिया