काठमाडौं । डिफेन्डिङ च्याम्पियन अर्जेन्टिनाले इंग्ल्यान्डलाई २-१ ले पराजित गर्दै फिफा विश्वकपको फाइनलमा स्थान सुरक्षित गरेको छ ।
रोमाञ्चक सेमिफाइनल खेलको पहिलो हाफ गोलरहित बराबरीमा सकिएको थियो । दोस्रो हाफको ५५ औँ मिनेटमा इंग्ल्यान्डका एन्थोनी गोर्डनले गोल गर्दै टोलीलाई अग्रता दिलाएका थिए ।
खेलको अन्तिम चरणमा अर्जेन्टिनाले उत्कृष्ट पुनरागमन गर्दै नतिजा आफ्नो पक्षमा पार्न सफल भयो । खेलको ८५ औँ मिनेटमा इन्जो फर्नान्डेजले गोल गर्दै अर्जेन्टिनालाई १-१ को बराबरीमा ल्याए ।
त्यसपछि इन्जुरी समयको निर्णायक क्षणमा लौतारो मार्टिनेजले विजयी गोल गर्दै अर्जेन्टिनालाई २-१ को रोमाञ्चक जित दिलाए ।
यस हारसँगै इंग्ल्यान्डको ६० वर्षपछि विश्वकप फाइनल पुग्ने सपना अधुरै बनेको छ । सन् १९६६ मा एकमात्र विश्वकप उपाधि जितेको इंग्ल्यान्ड फेरि एकपटक सेमिफाइनलमै रोकिएको हो ।
जितसँगै अर्जेन्टिनाले लगातार दोस्रो विश्वकप उपाधि जित्ने अभियानलाई जीवित राखेको छ । अब अर्जेन्टिनाले उपाधिका लागि फाइनलमा स्पेनसँग प्रतिस्पर्धा गर्नेछ । स्पेनले पहिलो सेमिफाइनलमा फ्रान्सलाई २-० ले पराजित गर्दै फाइनल यात्रा तय गरेको थियो ।
प्रतिक्रिया