काठमाडौं । नेकपा (एमाले) बागमती प्रदेश सरकारबाट बाहिरिएको छ । पार्टीको बागमती प्रदेश संसदीय दलले सरकारबाट बाहिरिने निर्णय गरेसँगै एमालेका तर्फबाट सरकारमा सहभागी मन्त्रीहरूले आज (बुधबार) मुख्यमन्त्रीसमक्ष राजीनामा बुझाउने भएका छन् ।
बागमती प्रदेश संसदीय दलका नेता जगन्नाथ थपलियाले मंगलबार बसेको दलको बैठकले सरकारबाट बाहिरिने निर्णय गरेको जानकारी दिए । उनले अब नयाँ राजनीतिक समीकरणअनुसार मिल्न सक्ने दलसँग सहकार्य गरी नयाँ सरकार गठनको प्रक्रिया अघि बढाइने बताए ।
थपलियाले नेकपासँग सत्ता सहकार्यको सम्भावना रहेको दाबी गर्दै प्रदेशमा नयाँ गठबन्धन बन्ने संकेत गरे ।
यसअघि मंगलबार एमाले अध्यक्ष केपी शर्मा ओली र नेकपाका संयोजक पुष्पकमल दाहाल ‘प्रचण्ड’बीच भक्तपुरस्थित ओली निवासमा समसामयिक राजनीतिक अवस्था र सत्ता समीकरणबारे छलफल भएको थियो । सोही भेटवार्तापछि बागमती प्रदेशको राजनीतिमा नयाँ घटनाक्रम विकसित भएको हो ।
प्रतिक्रिया