काठमाडौं । देशभरका चिकित्सकहरू आन्दोलनमा उत्रिएपछि सरकारले वार्ताको पहल थालेको छ। नेपाल चिकित्सक संघको नेतृत्वमा दुई दिनदेखि जारी आन्दोलन रोक्ने र चिकित्सकका मागका सन्दर्भमा हाल स्वास्थ्य तथा जनसंख्या मन्त्रालयमा मंगलबार साँझ छलफल भएको हो ।
वार्तामा स्वास्थ्य मन्त्री प्रदीप पौडेल, कानुन मन्त्री अजय चौरसिया र उद्योग मन्त्री दामोदर भण्डारी सहभागी छन् भने नेपाल चिकित्सक संघका अध्यक्ष डा. अनिल कार्की, महासचिव डा. सन्दीप तिवारी लगायतका पदाधिकारी र स्वास्थ्य सचिव डा. विकास देवकोटा पनि सहभागी छन्।
सरकारले औपचारिक रूपमा संघलाई वार्तामा बोलाएपछि संवाद सुरु भएको हो। पछिल्लो समय उपभोक्ता अदालतले चिकित्सकीय लापरबाहीसम्बन्धी मुद्दामा अस्पताल र चिकित्सकमाथि क्षतिपूर्ति तिराउने फैसला गरेको थियो।
जसमध्ये ओम अस्पतालले ५० लाख ७० हजार रुपैयाँ, हिमाल अस्पताल र संलग्न चिकित्सकहरूले १ करोड ४५ लाख रुपैयाँ तथा ग्रान्डी सिटी अस्पताल र त्यहाँ कार्यरत चिकित्सकहरूले ५७ लाख रुपैयाँ बिरामी पक्षलाई क्षतिपूर्ति दिनुपर्ने फैसला भएको हो।
नेपाल चिकित्सक संघले यस्तो फैसलाले नेपाल मेडिकल काउन्सिलको अधिकारमाथि हस्तक्षेप गरेको आरोप लगाउँदै सोमबारदेखि देशभर आकस्मिकबाहेकका सेवा बन्द गरेको हो।
प्रतिक्रिया